Buorre siivu
Go lea skáva, de lea hui buorre siivu, buorre jođádat. Reahka lea hui jođán, ja sabehat leat hui jođánat. Dalle ii guotte gal olbmo nu ahte ii leat guottádat, muhto dušše jođádat.
Ellon Áilu, Aslak Persen Bals čilge min dalá mielbargái Per Johannes Marainenii ná:
Dálkesorta dat mearrida
Cuoŋománu loahpageahčen beaivvadatbeaivvi de golmma njealji sulaid sáhttá skávvugoahtit suoivanbealde, jos lea goalki. Balvadálkin de ii skávo gal ovdalgo nulla grádas. Nu oidno Yngve Ryd Snø-girjjis, mas Johkamohki almmái Johan Rassa lea čilgen muohtasániid.