Siox-indiánat mannan diggái
DNB báŋku juolluda miljárddaid riidduvuloš oljorevrii, ja dat lea dagahan ahte amerihkálaš Sioux- indiánat leat mannan diggái dáinna áššiin. Plánejuvvon oljorevre galget bidjat dušše 800 mehtera eret Standing Rock Sioux álbmoga reserváhtas, láhka Lake Oahe ja Missouri-joga. Dát revre galgá transporteret álgoviđa oljju Missouri joga vuolde, jus dat huksejuvvo. Eamiálbmot ballá ahte bassi guovllut ja hávdeeatnamat billistuvvojit huksenbarggu vuolde, ja jus boahtteáiggis olju suođđu, de dat nuoskkida juhkančázi.