Máilmmi dovdoseamos luođi juoigi lea vádjolan

Gaskavahko bođii diehtu ahte Simmona Máhtte, Mattis Simonsen Hætta, lea vádjolan.

Máhtte šattai 63 jagi boarisin. Son bajásšattai Mázes, Guovdageainnu suohkanis.

Máhtte, gii dagai luođi dovddusin olles Eurohpái 1980:s go juoiggai «Sámiid Ædnan» luođi Eurovision Song Contest-gilvvuin, jámii buozalmasvuođa geažil.

Go Eurohpá oahpai juoigat

Simmona Máhtte šattai legendáralaš Norgga Melodi Grand Prixa oktavuođas 1980:s.

Ovttas Sverre Kjelsbergain vuittiiga soai Norgga gilvvuid ja nu beasaiga Norgga ovddastit Eurovisionas. Gilvvuin soai olaheigga 16. saji.

Sverre Kjelsberg jámii 2016:s.

Earretgo musihkkár, lei Simmona Máhtes oahpaheaddjeoahppu. Son lei maid neavttár.

Son neavttašii Beaivváš Sámi Teáhteris. Máhtte lei maid mielde TV-ráidduin, nugo «Skáidi» ja «Hjerterått». Maiddai «Guovdageainnu stuimmit» filmmas lei sus rolla.

Neavttár Mikkel Gaup lea máŋgii neavttašan seamma filmmas ja tv-ráiddus go Simmona Máhtte. Son atná Máhte árvvus.

– Buorremielalaš olmmoš guhte lávii liikot muitalit fearaniid ja buktit rávvagiid. Ean dušše bargan ovttas, moai leimme fulkkežagat maid.

Mikkel Gaup lohká agibeaivve muitit dan beaivve go Simmona Máhtte vuittii Melodi Grand Prixa.

– In vajálduhtte goassege dien beavve go luohti šattai norgga bivnnuheamos šuokŋa. Mun ledjen nu rámis, ja diet mearkkašii mearehis olu sápmelaččaide. Ieš in lean go nuorra lunttaš, logijahkásaš.

Lei inspirašuvdnan

– Simmona Máhtte lei okta min duostileamosin gii čalmmustahtii luođi Norggas ja internašonála lávddis ovttas Sverre Kjelsberggain.

Nu muitala Mari Boine NRK:ii.

– Sámiid Ædnan šuokŋa, mainna oasálasttii Grand Prix:as lei dehálaš ja mun guldalin olu sutno skearru. Dát lei 80-logus go ieš čálligohten. Nu ahte soai guktot leaba mu inspireren, muitala artista.

Vuosttildii Álttá-akšuvnnas

«Sámiid Ædnan» luohti ja lávlla lei politihkalaš ja čujuhii Áltta/Guovdageainnu-eanu dulvadanáššái, mii dien áigge lei báhkka ášši Norgga servodagas.

Áššis lei stuorra mearkkašupmi Norgga sámepolitihkkii, ja dagahii ahte Sámediggi vuođđuduvvui.

Máhtte lei sámegilážis, Mázes eret. Ráđđehus áigguige su ruovttubáikki dulvadit, muhto jorgaledje áššis ja ráfáidahtte Máze 1973:s.

– Son lei hui servvodatberošteaddji. Sus ledje garra oaivilat, ja lei mielde dalle go ledje nealgudeamit 1979:s, muitala historihkar Katri Somby.

Gávcci nealgudeaddji ceggejedje lávu Stuorradikki olggobeallái 1979:s, ja nealgudedje iežaideaset. Máhtte ii nealgudan iežas, muhto searvvai vuosttildemiide.

Birrasii vahkku maŋŋá jorgalii ráđđehus, ja bissehii huksemiid Savvonis gaskaboddosaččat.

– Guovddáš sámelihkadusas

Son lei hui guovddáš ja dehálaš sámelihkadusa álggus, čilge Katri.

– «Máze»-albummas lea maiddái veahá servvodatkritihkka. Sus lei álo veahá «edge» das maid son dagai, dadjá son.

Maŋŋá go vuittii Norgga Melodi Grand Prixa, de son searvvai Sámi Grand Prix:ii.

– Son searvvai várra guktii. «Váibmošiella»-lávlagiin livččii son galgat vuoitit. Dat lea mu oaivil, he was robbed, čaimmasta Katri.

– Dat lea váivves sáhka go nie lea mannan.