Gumppet goddet sávzzaid go dat leat menddo njoazi, dan dat oaivvilda Oslo, Akershusa ja Østfolda fuođđulávdegottejođiheaddji Øyvind Solum, maŋŋel go 150 sávzza leat goddon gumpii Hurdal ja Gran guovllus. Dasa eai mieđa boanddat, ja dadjet unnán erohus ruohttá go sávza 35 dahje 40 kilomehtera tiibmui.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.