Vásihii ilgadis ija: – Gumpe lea massakreren mu sávzzaid

– Dáppe vázzet sávzzat mat leat buot varran... Čeabet buot varran. Bahta varran. Ja dieđus ruoksájit miehtá dáppe ráppit.

Nie govvida Alf Kristian Eriksen ovddit ija dáhpáhusa. Sávzaboanda manai ihkku iskat iežas ealu. Sávzzat ledje dál ovdalaš dálvvi guohtumin Šuoššjávrris Kárášjoga ja Guovdageainnu gieldda rájás.

Muhto gii jáhkii ahte dát ruonas gieddi galggai varahuvvat, ja ná olu vel, buot ruoksadin.

Dáppe lea fitnan návdi.

– Luottaid dáfus oainnán mun ahte dat leat issoras stuorrát. Ja Stáda luonddubearráigeahču almmái maid hálai ahte dát ii sáhte leat beana, ja seamma vuogi mielde goddán sávzzaid.

– Dás leamaš gumpe, oaivvilda Eriksen.

Son lei suorganan go oinnii mo sávzaealuin lei geavvan. Son lea gávdnan 13 jápmán sávzza, čieža leat gaikkoduvvon ja guokte eai leat gávdnan.

– Ilgat, ilgat dat lea. Ii dát leat leaika dat han lea olles čora maid dat lea goddán. Dat han lea dadjat massakreren dáppe. Dát leat eallit maidda mun lean buorre, dadjá boanda.

Gumpe lea speadjan ealus, dadjá Eriksen, ja muhtun sávzzaid borran veaháš, earáid gis goddán ja dušše guođđán dasa.

Ohcamin luottaid

Magne Asheimas lea ovddasvástádus bearráigeahččat boraspiriid Finnmárkkus Stáda luonddubearráigeahču (SNO) ovddas. Son duođašta ahte SNO lea fitnan iskamin ráppiid Šuoššjávrris.

Asheim ii leat vuos sihkkar ahte leamaš go gumpe jođus.

– Muhto lea gaikkodan ja maiddái borran osiid sávzzain. Nu ahte dát orru leamen gumpe mii leamaš jođus, dadjá Asheim.

Boraspirečeahppi lasiha ahte dán áigodagas bohtet muhtimin gumppet Suomas Finnmárkui. SNO:s lea dál bargi ohcamin DNA luottaid, dahje guolggaid ja baikkaid mat sáhttet duođaštit ahte lea duođaid gumpe.

– Dat mii lea imaš lea ahte guovllus mas lea sáhka leat dál bohccot, muhto mii eat leat vuos badjeolbmuin ožžon makkárge dieđu ahte ealu siste lea leamaš gumpe, dadjá SNO ovddasvástideaddji.

Bearrašis váivi

Eriksen ja bearaš lávejit ovttas áimmahuššat sávzzaid.

– Dát gal lea hirbmat váivi midjiide. Mii leat buohkat, bearaš ja mánát, áimmahuššan dáid lábbáid mat dál leat goddon.

– Dasa lassin lea váttis diehtit man stuorra ruđalaš vahát dát lea munnje, go dát ledje eanaš njiŋŋelasat mat galggašedje guoddit lábbáid boahtteáiggis. Dan ii sáhte makkárge buhtadus gokčat, dadjá Alf Kristian Eriksen.