Dáidaga ovddidanguovddáš «Taike» lea juohkán 588.000 euro doarjagiid máŋggadáidagii, máŋggakultuvrralašvuhtii ja riikkaidgaskasaš doaimmaid ovddideapmái. Sámis doarjagiid oažžuba dán jagi Marja Helander ja Ima Aikio-Arianaick, dieđiha
Yle Sápmi.
Aikio-Arianaick oažžu 600 euro mátkeruđa Bulgaria-mátkái ja Helander 3000 euro máŋggakultuvrralašvuođa veahkkeruđa videodáidaga buvttadeapmái Ruoššas ja Anáris.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.