Daid maŋemus jagiid leat ollu sámi artisttat bádden sálmmaid, vaikko dábálaččat lávlot áibbas earálágan lávlagiid. Muhto lea go mihkke earenoamážit maid ferte váldit vuhtii jus ráhkada ođđa vuoiŋŋalaš musihka? Dán birra lei sáhka Luo-Mus Máilmmis golggotmánu 24. beaivvi.
Lávlu movttegit Jesusa birra
John Henrik Mienna lea bádden čieža lávlaga main lea risttalaš sisdoallu. Su lávlagat "Don leat nu divrras", "Mun ráhkistan Jesusa" ja "Son áigu álo leat du mielde" leat dávjá gullon radios. Ja earenoamážit Ávvudanbottus háliidit guldaleaddjit gullat su lávlagiid.
Gula John Henrik Mienna:
Ráhkadii sálmma mas lea luohti
Frode Fjellheim almmuhii njeallje jagi áigi cd mas lea musihkka mii lea heivehuvvon girkui. Das lea namma Aejliies Gaaltije (bassi gáldu) ja Fjellheim lea ohcan dološ lullisámi šuoŋaid maid lea ođasmahttán. Ja son lea luođi atnán vuođđun dán buvttadeapmái.
Gula ságastallama Frode Fjellheimain dán cd birra:
Sálbmalávlu geas lea juoigalas bearaš
Sárá Máret A. Gaup almmuhii 2002s olles cd mas leat dušše sálmmat. "Vuoiŋŋalaš lávlagat" lea dan namma, ja dál lea bargagoahtán nuppiin sálbma-cdain. Ieš gullá Sárá Máret bearrašii mas leat ollu juoigit, Áilloš, Sara Marielle Gaup ja Ánte Nihkkal Gaup. -Dat leat nu máåggas geat juiget, ja dat gal várra ii noga. Muhto sámi sálbmalávlun gal dáidá nohkat, jus dan ii lávllo oktage, lohká Sárá Maret, dasa ahte manne son válljii sálmmaid lávlut ii ge juoigat.
Gula jearahallama Sárá Máret Gaupain:
Láviiga nohkestit sotnabeaiskuvllas
Duolva Duoddara Ivan ja Fred láviiga mánnán fitnat sotnabeaiskuvllas, ja lohkaba ahte sutnos ii leat dán áigge gal nu ollu dahkamuš sálmmaiguin. Leaikkastallaba ahte lávii nu buorre nohkkat go gullá sálmmaid. -Soaitá ahte go olmmoš láddá de sáhttá lávlut sálmmaid, muhto dál goit ii vuos, lohká Fred.
Gula Duolva Duoddara Ivan ja Fred:
