NRK Meny
Normal

Sámi mánát vuoruhuvvojit gáržžes sámediggebušeahtas

Sámediggeráđđi almmuhii odne bušeahttaevttohusas Sámediggái jahkái 2016.

Sametinget, sametingsbygget

«Mánáid Sámediggi» lea okta doaibmabijuin masa sámediggeráđđi evttoha juolludit ruđa.

Foto: Dan Robert Larsen / NRK

– Ráđđehusa stáhtabušeahttaevttohusas gáržžiduvvojit rámmat sámi servodaga ovddideapmái, čilge sámediggeráđđi Ann-Mari Thomassen.

Ann-Mari Thomassen

Sámediggeráđđelahttu Ann-Mari Thomassen (NSR).

Foto: Vaino Rensberg / NRK

Sámediggeráđi bušeahttaevttohusas Sámediggái jahkái 2016 lea oktiibuot gollorámman 434 miljon ruvnnu, mii lea 5,6 miljon ruvnnu eanetgo jagi 2015 ođastuvvon bušeahtas, muhto go rehkenastá hadde- ja bálkálassáneami ektui, de lea bušeahtta duohtavuođas njiedjan 0,5 % go buohtastahttá ovddit jagi bušeahtain.

– Bušeahta geažil fertet geahpedit doaimmaid sámi servodagas, muđui gal stáhtabušeahtta lea sakka ovdánan. Muhto mun lean duhtavaš go mii hui gáržžes rámmaid siskkobealde leat nagodan vuoruhit doaibmabijuid nannet sámi giela, erenoamážit mánáid ja nuoraid ektui. Midjiide lea deaŧalaš láhčit dili nu ahte mánát galggašedje oahppat eanet sámepolitihka ja demokratiija birra, deattuha Thomassen.

Mánáid Sámediggi

Sámediggeráđđi evttoha juolludit 400.000 ruvnnu «Mánáid Sámediggái».

Sámediggi árvala vuoruhit barggu oččodit eanet váhnemiid oahpahit sámegiela mánáidasaset.

Ráđđi evttoha muđui ahte ásahuvvošii ođđa giellaarena joatkkaskuvllaid nuoraide geat váldet sámegiela.

Ruhta sámi giellaguovddážiidda evttohuvvo lasihuvvot 4 miljon ruvnnuin.

Ruhta sámi kulturásahusaide evttohuvvojit lasihuvvot 1,7 miljon ruvnnuin.

– Juolludus máttasámi kulturfestiválii šaddá njealjegeardásaš boahtte jagi. Dieinna lágiin leat mii válljen vuoruhit surggiid gos dárbu lea stuorámus, muhto mu mielas gal lea hui unna doaibmamunni Sámedikki 2016 bušeahtas, mieđiha Ann-Mari Thomasse