Sámi jienastuslohku stuorru

Gávpogiin nugo Oslos ja Tromssas háliidit eambbosat jienastit Sámedikke válggain. Muhto sámi suohkaniin njiedjá jienastuslohku.

Valgurne
Foto: Borgen, Ørn E. / SCANPIX

Sámi jienastuslohku lea lassánan measta 600 olbmuin 2005 rájes. Nu čájehit gaskaboddosaš logut.

Guovdageainnus ja Kárášjogas lea sámi jienastuslohku njiedjan oktiibuot 127 olbmuin.

Maiddái Deanus, Unjárggas, Gáivuonas, Divttasvuonas ja Snoasas lea jienastuslohku njiedjan.

GULDAL: JIENASTUSLOHKU

Áigu buoridit

Klemet Erland Hætta lea goalmmát sajis NSR:a listtus Ávjovárii válgabiires, ja son áigu ožžodit eambbosiid jienastuslohkui Sis-Finnmárkkus.

– Mii fertet ražastit vai oažžut olbmuid čálihit iežaset jienastuslohkui dáppe Sis-Finnmárkkus, dadjá Hætta.

Ja lea ain vejolaš dieđihit iežas sámi jienastuslohkui gitta geassemánu 30 beaivve rádjai jus áigu čakčat jienastit sámediggi válggain.