Dát čájáhus lea Sámiid Vuorká-Dávviriid 40 jagi ávvočájáhus jagi 2012s Kárášjogas. Dáiddačájáhusas leat 40 dáiddalaš barggu - okta dáidda juohke jagi nammii.
Čájáhusas leat mielde logi sámi dáiddára Norggas ja Ruoŧas, geat leat válljen čájáhussii njeallje iešguđetlágan dáidaga juohke jagi nammii. Dáiddárat leat válljen dáiddabargguid maid oaivvildedje leat dehálažžan váldit mielde ávvočájáhussii. Dát logi dáiddára leat beroštumiideaset ja bargguideaset vuođul iešguđetge vuogi mielde hábmen ja váikkuhan sámi dálááigge dáidaga ja dáiddaduoji ovdáneapmái.
Máŋggabealát sámi kultuvra
Sámi dáidda 40 jagi čađa lea ollen Guovdageaidnui ja RiddoDuottarMusea bargi Johan Ailo Hætta illuda.
– Dat lea johttičájáhus maid mii leat vuordán. Geassi lea buorre áigi dákkár čájáhussii. Mis leat olu amas guossit mat eai dovdda sámi kultuvra nu bures, ja lea hui somá čájehit sidjiide ahte mis leat dáiddárat ja erenoamáš fiinna duojit.
Dáiddárat ja duojárat, geat leat mielde; Josef Halse, Jon Ole Andersen, Maja Dunfjeld, Britta Marakatt-Labba, Per Isak Juuso, Hans Ragnar Mathisen, Aage Gaup, Rannveig Persen, Randi Marainen ja Trygve Lund Guttormsen rohkki.
Dáiddačájáhus čájehuvvo RDM-Guovdageainnu gilišilljus miehtá geasi: 23.06.-01.09.2014.