Johan Anders Bær mielas galggašii SGP ovdánit, go beare guhká lea dát juoigan- ja lávlungilvu lágiduvvon seamma ládje.
– Galggašii lágidit doaluid nugo Norgga Grand Prixas. Oassefinálaid álggos maid filbmejit ja de ráhkadit TV-prográmma das. Oassefinálaid vihtta juoigi ja lávlu deaivvadit de finálas. De mun jáhkán ahte olbmuin maid lassána beroštupmi gilvui, lohká Bær.
Bær lohká ahte SGP ii galggaše bissut dálá hámis, ahte olbmot sáddejit skearru ja dain vuođul vállje jury oasseválddiid finálii, mii lágiduvvo Guovdageainnus beassášlávvordaga.
Unnán beroštupmi
Ii oktage leat vel dieđihan luođi iige lávlaga dán jagi SGP:i. Dieđihan áigemearri lea vahku geažes.
10 juoiganoasseváldi ja 6 lávlunoasseváldi galggaše leat gergosat guovtti vahku geažes. SGP-buvttadeaddji lea jurddašan olu dán birra, ja lea álgán ieš bargat áššiin.
– Mun lean oktavuođa váldán olbmuiguin geat soitet háliidit searvat, ja muhtimat leat munnje dadjan njálmmálaččat ahte sii áigot searvát, lohká Nils Johan Vars.
Sámi medias beroštupmi stuorat lágideapmái
NRK Sápmi, SVT Sápmi ja Yle Sápmi leat buohkat mielas gullat eambbo SGP-lágideaddjis jus son háliida stuorat buvttadeami. Lágidit oassefinálaid ja čájehit daid TV:s ja neahtas.
- Guldal radioášši:
SGP-buvttadeaddji ii sáhte vel lohkat áibbas sihkkarit ahte lágida čoahkkima masa bovde sámi tv-buvttadeddjiid, muhto lohká ahte dát lea juoga maid áigu árvvoštallat.