Odd Mathis Hætta muitala iežas čohkken olu dieđiud oahpaheaddjibarggu olis, iešguđege guovlluin Finnmárkkus. Dáid dieđuid geavahii oahpahusas, ja dál leat dát dieđut čohkkejuvvon guovtti girjái. Girjjiin čállá son ekologalaš jurdaga vuođul, ja dát galget de doaibmat diehtogáldun. Ieš navdá girjjiid leat ávkin boahtteáiggis maid.
Buorit dieđut boahtte áigái
Čálli muitala iežas dan vuosttaš girjjis čállán Sis Finnmárkku geologias, das čilge son guovllu eatnamiin, makkárat dat leat, ja mo dat leat rievdan. Čállá maid dálkkádagas, šattuin ja elliin. Justa dás lea eanemus sáhka Kárášjoga ja Guovdageainnu guovllus. Luonddu čállá leat leamaš guovddážis dolin, dalle go olbmot galge válljet gosa ásáiduvve. Vuosttaš girjjis čállá maid Sis Finnmarkku minerálain, ja makkár geađgesoarttat gávdnojit Sis-Finnmárkkus.
Nuppi girjjis lea eanaš sáhka olbmuin, gos ja mo sii ásse, čállá maid gilážiin. Nuppi girjjis besset maid olbmot muitalit fearániin maid leat vásihan dahje leat gullan .
Guokte girjji almmustahtii dárogillii
Guokte girjji son dál lea almmustahttán dárogillii, «Samebygder på Finnmarksvidda I» ja «Samebygder på Finnmarksvidda II», oktiibuot 630 siiddu. Girjjiin leat olu govat.
Odd Mathis Hætta muitala geavahan guhkes áiggi čállit dáid girjjiid. Ii loga iežas čállán jámmadit, muhtimin lea vuoiŋŋastan oalle guhka, ja de lea fas čálligoahtán.
Dan áigge go dieđuid čohkkii de geavahii daid oahpahusas vuođđoskuvllas ja oahpaheaddjiallaskuvllas. Son jearahalai olbmuid jietnabáttiide, jearahalai moddii daid seamma olbmuid vai šaddet buot dieđut mielde. Ja de leatge das šaddan guokte girjji.
Odd Mathis Hætta girjjit
Foto: Anne Olli
