Gieskat besse olbmot gullat Matti Aikios girjjálašvuođaguovddážis Kárášjogas. Aikio lei kárášjohkalaš gean gastanamma lei Mathis Isacksen, son lei Luhkkár Máhte Máhtte. Aikio vulggii nuorran Kristiániai gos áiggui lohkat alit ohppui, muhto nu ii geavvan, son šattai girječállin.
Aikio elii 1872 rájes 1929 rádjai. Son ásai eanaš áigge máddin, gos son lei beakkánis čálli. Son čálii sihke románaid, ártihkkaliid ja earáge čállosiid, ja barggaid maid journalisttan máddin.
Amerihkkálaš profeassor jorgaliid Aikio girjjiid eaŋgalasgillii
Profeassor John Weinstock, gii lea Texasa Austin universitehtta profeassor, son logai Matti Aikio birra girjjis maid Harald Gaski lea čállán, nu fuomášii son jorgalit Aikio girjjiid eaŋgalasgillii. Nu lea son buot Aikio románaid jorgalan. Dál dušše vuorddaša ahte máilmmi olbmot fuomášit Matti Aikio románaid maid son lea jorgalan eaŋgalasgillii.
Aikio fuolki lohká suoli dáinna čevllohallat
Kárášjohkalaš Astrid Johnskareng lei maid Matti Aikio semináras maid ČálliidLágádus gieskat lágidii. Son muitala hálidan gullat iežas fuolkkis, danne son bođii seminárii. Ja dál go gulla ahte su fuolkki románat leat jorgaluvvon máilmmigillii, eaŋgalasgillii, na de gal lohká iežas suoli dáinna čevllohallat.