Lei 2016 guovvamánus ahte Finnsnes dievdu ozai vuodjinlobi geasehit gálvvuid iežas ruovttus várevuoljávrri rádjai Leaŋgáviika suohkanis. Ohcci ohcamuš hilgojuvvui go dat vuosttaš geardde meannuduvvui Leaŋgáviika suohkana hálddahusas, ja dievdu váiddi mearrádusa.
2,5 kilomehtara biilaluottas eret
Ráđđeolmmái geahčadii ášši ođđasit, ja ákkastalai ahte suohkanis ii leat lágalaš riekti juolludit vuodjinlobi, ja son čujuhiige maiddái ahte lea vuollil 2,5 km biilaluottas bartta rádjai, ja hilggui váidaga.
Dievdu ii duhtan mearrádusain ja váiddii ođđasit, ja dalle Leaŋgáviika ráđđeolmmái vuhtiiválddii váidaga ja juolludii vuodjinlobi.
Leaŋgáviika suohkan juolludii dasto divdui vuodjinlobi golmma jahkái.
Gomihii mearrádusa
Fylkkamánni čujuha reivves ahte suohkan ii leat bidjan meari galle tuvrra dievdu oažžu vuoddjit, ja ahte suohkan lága mielde ii sáhte rihkkut lága ja juolludit vuodjinlobi.
Fylkkamánni čujuha mearrádusas maiddai dasa ahte hyhtta lea vuolil 2,5 km eret biillaluottas, ja lea dasto gomihan Leaŋgáviika suohkana mearrádusa mas juolludedje dievdui vuodjinlobi.
2,5 kilomehtera luddii
Lei Leaŋgáviika leansmánne guhte bivddii fylkkamánni geahčadit čieža juolluduvvon vuodjinlobiid maid Leaŋgáviikka suohkan lei juolludan.
Romssa fylkkamánni birasgáhttendirektevra ja doaibmi fylkkamánni, Eva Jørgensen, dadjá ahte ja sii leat gomihan njeallje dain čieža vuodjinlobiin maid Leaŋgáviika leansmánni lei váidán.
Buot čieža vuodjinlobiid maid Leaŋgáviika suohkan lei juolludan lagamus biillaluottas Várevuoljávrri hyhttaguvlui, mii lea vuolil 2,5 kilomehtera luottas eret.
– Čielga láhkarihkkun
– Dát lea čielga láhkarihkkun, go suohkan lea juolludan vuodjinlobi go báiki gosa galget vuoddjit lea vuolil 2,5 kilomehter biillaluottas eret.
Evy Jørgensen dadjá ahte sáhttá leat sihke diehtemeahttunvuohta dahje berošmeahttunvuohta mii lea duogáš dasa go suohkanat juolludit vuodjinlobiid mat leat lágaid vuostá.
