Guokte darfegoađi Olgolis ja okta Spittás leat ceggejuvvon muittuhandihte mo olbmot guovllus elle 1400-1600 logus.
Viiddiduvvo
Lei jagi 2000 go arkeloga Svein Erik Grydeland čalmmustahtii mo olbmot Návuonas leat eallán dolin, ahte Davvi-Romssa vuorkádávvir álggahii prošeavtta cegget darfegođiid čájehandihte mo olbmot dáin guovlluin orro dolin. Lea Ragnhild Enoksen gii doaimmaha prošeavtta, ja dán geasi lea son huksemin luovi.
– Mii geavahit verdde Guovdageainnus veahkkin hukset luovi, dadjá Ragnhild Enoksen ja rámida iežas verdde Aslak Isak Skum gii neavvu sin mo galget cegget dán.
Enoksen gohčoda verddes mentorin.
Huksejuvvon seamma hámis go dolin
Návuona siidda prošeaktajođiheaddji, Ragnhild Enoksen sávva buohkaid boahtit geahččat sin siidda. Dáppe fitnet dál eanaš skuvlaluohkát ja joavkkut geat hálidit oaidnit mo ovdalašáiggi elle oluhat Návuonas. Dál hálida Enoksen ahte eanet suohkana ássit bohtet geahččat maid leat huksen.
– Dat mii lea erenoamaš nugo gođiiguin lea ahte leat huksejuvvon juste seamma hámis go dolin, ja ii leat geavahuvvon ii oktage spihkkár goahtehuksemii, čilge Aslak Isak Skum.
Skum rámpo goahtehuksejeaddji, go eai gávdno šat nu gallis geat dáinna lágiin huksejit darfegoađi.