– Dat lea hui stuora dáhpáhus, go dat lea dat vuosttáš sámi guhkesfilbma mii lea dahkkon logi jáhkkái, ja dat filbma manná njuolgá ovtta dain máilmmi stuorámus filbmafestiválii, de sáhttá dadjat ahte dat lea sensašuvdna. Dát filbma lea dat vuosttaš guhkesfilbma maid sámi filbmainstituhta lea dorjon, ja go dat manná njuolgá dákkár stuora festiválii, de lea dat hui stuora mearkkašupmi, maiddái dan bargui maid mii leat bargama ahte hukset sámi filbmaealáhusa. Mii leat maid rahčamen dan ala ahte oaččut eanet ruhtadeami justte fal guhkes filmmaide ja tv-ráidduide, nu dadjá Internašunála Sámi filbmainstituhta direktevra, Anne Lajla Utsi.
Sámi filmmat máttkoštit máilmmis
Utsi muitala ahte go Amanda Kernell filbma čájehuvvo filbmafestiválas, de dat mearkkaša dan ahte sámi filmmat mátkkoštit meaddel buot kultur- ja giellarájiid.
– Min muitalusat leat dakkár universála muitalusat, mat eai leat dušše sámiide miellagiddevaččat, muhto maiddái muđui máilmmis háliidit oaidnit ja gullát min filmmaid ja muitalusaid, dadjá son.
Filmma bagadeaddji lea rámis
Filmma bagadeaddji, Amanda Kernell muitala
ahte son lean hui ilus ja rámis ja veaháš balus.– Dat lea hirbmat stuora dáhpáhus ahte mu filmmas lea premiere Venezia gávpogis, go Venezia filbmafestivála lea máilmmi boarráseamos filbmafestivála. Dat lea nu somá go filmmas lea dákkár álgu, dadjá Kernell.
Filmmas buorit vejolašvuođat
«Sameblod» filbma galgá gilvalit Venice Days nammasaš gilvvus, gos fokuserejuvvo bagadeddjiid kreatiiva ja ođđahutkan bargguide. Anne Lajla Utsi jáhkká ahte Amanda Kernell filmmas lea buorre vejolašvuohta gilvvus.
– Sus leat seamma buorit vejolašvuođat go buohkain earáin mat leat mielde gilvoprográmmas. Mun lean oaidnán su filmma, muhto dalle ii lean áibbas válmmas vel filbma. Muhto filbma lea hui erenomáš ja hui fiinna filbma ja Amanda Kernell lea hui čeahpes filbmamuitaleaddji. Nu ahte mun jáhkán sus leat buorit vejolašvuođat, muitala Utsi.
- Guldal ášši: