NRK Meny
Normal

Ávvudit davvisámegiel Biibbala 120 jagi beaivvi biibballohkamiin

Odne leat vássán 120 jagi das rájes go Biibbal almmuhuvvui vuosttaš háve davvisámegillii. Sámemišuvdna oaivvilda das leamaš stuora mearkkašumi.

Bibelen på samisk år 1895
Foto: Nasjonalbiblioteket

Dan vuosttaš sámegiel Biibbala almmuhii 1895:s Norges finnemisjon, mii maŋŋil rievdadii nama Norgga sámemišuvdnan. Dát lea ain dat áidna jorgalus sámegillii olles Biibbalis, mii lea almmuhuvvon. Vuosttaš almmuheamis deaddiledje 1150 girjji.

Ávvudit biibballohkamiin

Sámemišuvdna ávvuda odne almmuheami ja veahkkeváldočálli Thor Henrik With dadjá ahte dát lei Sámemišuvnna vuosttaš prošeakta ja duogáš dasa ahte Sámemišuvdna vuođđuduvvui 1888:s.

Thor Henrik With

Sámemišuvnna veahkkeváldočálli Thor Henrik With

Foto: Norges Samemisjon

– Mis šaddá odne erenoamáš čalmmustuhttin, mas mii ávvudit ahte lea 120 jagi áigi go Biibbal bođii vuosttaš geardde sámegillii. Ávvudeami oktavuođas áigut earret eará lohkat osiid sámi Biibbalis.

– Dehálaš leamaš čállingillii

Davvisámegiel Biibbalis lea leamaš stuora mearkkašupmi sámegiela geavaheapmái, oaivvilda With.

– Biibbalteavsttat leat leamaš guovddážis sámi kultuvrras 120 jagi. Dát teavsttat leat viššalit geavahuvvon ja nu leat dat maid leamaš dehálaččat erenoamážit sámegiela čállingiela seailluheami ja ovdáneami ektui.

Jorgaluvvome ođđasit

Dál lea Norgga biibbalsearvi bargame davvisámegiel Biibbala ođđa jorgalemiin. 1998:s almmuhuvvui Ođđa Testameantta ođđasit jorgaleapmi ja Boares Testameantta lea Norgga biibbalsearvi jorgaleame dál ovttas Suoma ja Ruoŧa biibbalservviiguin. Dát vurdojuvvo almmuhuvvot 2019:s.

– Lea lunddolaš ahte Biibbal jorgaluvvo ođđasit, sihke dan dihte go giella rievdá ja dan dihte go biibbaldutkan ovdána dan ektui ahte gávdnat daid buoremus teavsttaid vuođđun jorgalemiide.

Den samiske bibelen

Davvisámegiel Biibbal almmuhuvai vuosttaš geardde 120 jagi áigi, 1895:s.

Foto: Norges Samemisjon