Neahttasiidduid ferte juohke beaivvi ođasmahttit, lohká "Blått Blikk Media" mediaráđđeaddi, Wenche Pedersen.
Ii leat gul ávki dušše guossemállásiin hállat mo muitalit olbmuide maid sii barget, muhto maiddái dahkat dan - namalassii muitalit.
Beannot vahku
Go dál rahppá Norgga Sámedikki interneahttasiiddu www.samediggi.no, de rahpasa vuosttasin váldosiidu. Varraseamos dieđut dien siiddus ledje čállon njukčamánu 28. beaivvi, beannot vahku áigi. Nie lei sihke dárogiel ja sámegiel siidduin ikte.
Vuosttas siidu lea ásahusaid amadadju olggosguvlui - das sáhttá fas coahkkuhit eará siidduide gos gis gávdna eará dieđuid. Ná gávdna maiddái dan maid Sámediggi ieš čállá interneahttafálaldagas birra - namalassii ahte ovdal 2005 galget Sámedikki váldofálaldahkan geavaheaddjiide leat elektrovnnálaš bálvalusat.
Čuorbbit
Sámedikki várrepresideanta Marianne Balto mieđiha ahte leat čuorbbit interneahta bokte muitalit álbmogii maid sii barget.
Go otná ráđđi beasai fápmui čakčamánus diibmá, de lohpidii rahpat fas poastajournlaid nu ahte olbmot besset lohkat áššebáhpáriid neahtas. Dál oaidná dušše makkár áššit doppe jorret, ii daid dokumeanttaid. Dál lohpida várrepresideanta rahpat poastajournalaid fas ollásit.