NRK Meny
Normal

Sámediggi ii vuorut Várdobáikki kulturguovddáža

– Ii leat dárbu vuordit ruđaid stáhtas ovdalgo plánegoahtá Várdobáikki sámi giela- ja kulturguovddáža, oaivvilda Bargiidbellodaga parlamentáralašráđi jođiheaddji, Vibeke Larsen

Várdobáiki

Bargiidbellodaga sámediggejoavku dáhtošii Sámedikki juolludit ruđaid Várdobáikki kulturguovddáža prošekteren bargui, vuoi bargu álggahuvvošii boahtte jagi.

Foto: Mathis Eira / NRK

Ikte muitalii sámediggeráđi Henrik Olsen (NSR) ahte sámediggi lea evttohan ráđđehussii, ahte 2016 bušeahtas bidjo guokte miljon kruvnna plánet ođđa guovddáža, Evenáššái Norlándii.

Sámediggi duvdá ovddasvástádusa stáhtii dán áššis, ii leat dárbu vuordit ruđaid stáhtas ovdalgo plánegoahtá huksema.

Go jo Statsbygg galgá jođihit dán barggu, de oaivvilda son ahte ii leat dárbu vuordit ruhtadeami stáhtas ovdalgo prošekteren bargu álggahuvvo.

– Sámediggi sáhttá gokčat prošekteren barggu goluid dahje jo dáhkidit ahte mákset goluid jus dattege guovddáš ii huksejuvvo, čállá Larsen preassadieđáhusastis.

– Nu mo ovdalge leat dahkan

Son muitala Sámedikki ovdalge máksán goluid dahje dáhkidan ahte mákset goluid go Statsbygg lea prošekteren eará huksemiid.

– Sihke Sámi Dáiddamusea ja Sámi Našunálateáhtera, Beaivváža prošekteren bargu álggahuvvui ovdalgo stáhta juolludii ruđa dasa. Dalle Sámediggi mávssii dahje dáhkidii máksit prošekterenbarggu ovddas Statsbyggii, čilge Larsen.

Várdobáiki dáfus lea olu rievdaduvvon danne go leat plánegoahtán hukset ođđa viesu, čállá Larsen. – Dan sii leat dahkan báikkis gos leat olu sámi doaimmat, muhto dattege ii leat mihkkige mii čalmmustahttá sámevuođa, earretgo muhtin galbbat,mat leat biddjon veahá gosage.

Sámediggi ferte juolludit ruđaid dása

Váilevaš plánenbargu Várdobáikki kulturguovddáža prošekterema oktavuođas ii sáhte eará láhkai dulkot go ahte sámediggeráđđi ii leat njulgestaga vuoruhan dán barggu, Larsen oaivvilda.

– Lea váidalahtti go sámediggeráđđi duvdá stáhtii dán ášši go jo gearddi alddiineaset lea vejolaš álggahit prošekterenbarggu, Larsen lohká..

Bargiidbellodaga sámediggejoavku dáhtošii Sámedikki juolludit ruđa prošekterenbargui, vai bargu álggahuvvošii boahtte jagi.