Romssa fylkkasuohkan nanne sámi giella- ja kulturbarggu
Dan čállet preassadieđáhusas, ja dan sii dahket Duohtavuođa- ja seanadankommišuvnna raportta oktavuođas. Fylkkasuohkan lea ásahan doarjjaortnega mii galgá nannet, ovddidit ja čalmmustahttit giela ja kultuvrra Romssas.
Jahkái 2024 lea várrejuvvon 300.000 ruvnnu ođđa ortnegii. Ásahusat, organisašuvnnat, ovttaskas joavkkut ja maid priváhta olbmot sáhttet ohcat doarjaga dán ortnegis.
Doarjjaortnega ulbmil lea earret eará nannet máhtu sámi dilálašvuođa birra, ja ovddidit sámi dáidaga, kultuvrra ja giela, erenomážit mánáid ja nuoraid gaskkas, dadjá fylkkasátnejođiheaddji Kristina Torbergsen (Bb).
– Mun duođaid doaivvun ahte mii sáhttit leat mielde duohtandahkamin ollu buriid prošeavttaid boahtteáiggis, dadjá Torbergsen.