2007 vuittii Mikkel Isak Eira «Farmen» realitygilvvu. Ovtta beaivvi dáhtui okta dain eará gilvaleddjiin Mikkel Issáha einnostit su boahtteáiggi gáferugaid bokte. Ja go de nuppe beaivvi juo dáhpáhuvai dat maid Mikkel Issát lei "oaidnán", de gal jáhkkigohte eará gilvaleaddjit ahte Eira lea noaidi.
Ii liikon leat beakkálmas
Nubbe eará realityvuoiti boahtá maid Árdnii, Johan Mathis Buljo vuittii 71 grader nord 2002:s. Ja su mielas lei beakkánvuohta nu heahpat.
– Oktii ledjen doaluin Lillehammeris, dan seamma viesus ledje maid riegádanbeaivvedoalut. Ja go vázzen sin beavddi meaddel, de fuobmái dat 70-jahkásaš áhkku mu. Ja go son vel čuorvugođii mu, de gal nu heahpanin ahte ii lean leaika, muittaša Buljo Ártna-studios.
Youtube-beakkálmas
Árdnii boahtá maid Aili Kathrine Wergeland Teigmo, gii ođđajagimánus bijai iežas musihkkavideo Youtubai. Njealji mánus leat measta guokte miljovnna olbmo geahččan video. Ieš Teigmo lea hirpmáhuvvan.
– In goassege jáhkkán ahte ná ollusat beroštedje mu musihkkavideo geahččat, mus badjánii hirbmadit mokta dalle go 10.000 olbmo ledje geahččan, muitala Teigmo.
Loahpa geahčen sáddaga čuojaha Ágy, guhte ieš šattai hui beakkánin go NRK P3 čuojahišgođii su musihka diibmá.
Ártna oainnát NRK2:s mánnodagaid diibmu 20.55.