- Dán vuogi mielde mii sihkkarastit ahte álbmogii bohtet maiddái dat positiivva ođđasat, lohká Keskitalo.
Nu ledje ge ráđi barggut 2005` rájes sierra fáddán otná preassakonferánssas maid presideanta ieš doalai.
Konferanssas son beasai muitalit buot daid deháleapmos bargguid birra maid ráđđi lea doaimmahan ja čađahan dán áigodagas.
- Dehálaš álbmogii
- Mu mielas lea dehálaš NSR:ii muitalit maid mii leat ožžon doibmii dán áigodagas.
Sivva go otnážii lean bovden preassekonferansii, lea dát eahpesihkkaris parlamentaralaš dilli. Jus NSR:a masseš stivrejumi, de galget goitte olbmot diehtit maid mii leat olahan dán rádjai, lohká Keskitalo.
Čoggon ollu fáttát
Dušše vuoigatvuođaid rahčamušaide gullet badjil moaddenuppelohkái guoski čuoggá.
Bajimuččas lea dieđusge ONa eamiálbmotjulggaštus mii dál gieskat dohkkehuvvui Ovttastuvvan Nášuvnnain, ja mii galggašii nannet ahte eamiálbmogat galget adnojuvvot "álbmogin" seamma árvvuin ja vuoigatvuođaiguin go eará álbmogiin ge.
Davviriikalaš sámekonvenšuvdna
Nubbi dehálaš čuokkis maid ráđđi lea bidjan lea Dávviriikalaš sámekonvenšuvdna.
Dasto čuvvot nu go Láhkalasáhus Finnmárkkukommišuvnna ja Finnmárkku meahcceduopmostuolu várás, Boazodoallolága rievdadeapmi, Riddoguolástuslávdegoddi ja dásseárvo gažaldat jus oasi galggaš namahit.
Birasgáhtten ja kultursuodjaleapmi
Dán čuogggá vuolde leat earret eará Áššu ja Min Áiggi ovttastahttinplánat namahuvvon. Maiddái Sámefoanda ja giella gažaldagat leat dáppe.
Mánát ja nuorat
Dáid čuoggáin lea eanaš sáhka fálaldagain ja oahpahusain vuolimuš dásis gitta alimus dássái, maid ráđđi lea viggan nannet.
Ealáhusat
Ealáhusovdánahttin oktavuođas lea ráđđi bargan ealáhusaid nannemiin nugo boazodoalu, eanadoalu, guolástusa, meahcceealáhusa, duoji ja matkkoštanealáhusa.
Dearvvasvuohtabálvalusat
Deike gullá earret eará mánáidsuodjalus, dearvvasvuođa- ja sosialabálvalusat ja eará dearvvasvuođadoaimmat.
Regionala ovdánahttin ja ovttasbargu
Dán čuoggás čujuha ráđđi buotlágan ovttasbargodoaimmaide, iešguđege dásis, filkkaid -, regionala -, sámi - ja davviriikalaš ja muđui riikkaidgaskasaš ovttasbargodoaimmaide.