Nu lohká filbmainstituhta direktevra Anne Lajla Utsi. Son lea nu ilus go otne vuot beakkehii ahte stádabušeahtas de sidjiide juolludit 570 000 ruvnnu eanet go diibmá.
- Dá oainnát Internášunala Sámi Filbmainstituhta lassánemiid:
– Buorre gulahallan buot dási politihkkáriiguin lea dehálaš. Go mii deaivvadat našunala politihkkariiguin, de mis leat álo čielga plánat - álo guhkes áigge doaimmat. Mii eat vuolgge goassige ságastit politihkkáriiguin oaffarrollain, muitala Utsi. Son maid namuha mo sii dihtomielalaččat gulahallet eará riikka politihkkariiguin ja ožžot nai doarjaga Davviriikkaid ráđis.
Dialoga verddiiguin nanne doaimma
Dál go stádabušeahtta almmuhuvvui, de lea Utsi maid hui dihtomielalaš mo son gohčoda sihke politihkkáriid ja ovttasbargoguimmiid.
– Sii leat min verddet. Singuin de geahččalan hukset buriid oktavuođaid. Oaččut sis duohta ipmárdusa ja beroštumi dan min sámi filbmabuvttadeapmái, lohká Utsi.
–- Don gohčodat kulturministera maid verddiin?
– Juo, nu mun dagan. Mun han galggan singuin gulahallat ja muitalit manne sii fertejit vuoruhit ruđaid sámi doaimmaide ja erenoamážit filmmaide, dadjá Utsi mojunjálmmiid. Son nu illosii go oinnii dán jagi stádabušeahta ja lohká gal dan vuordemeahttumin, go guovtti jagis de lassánii doarjja váile 1,3 miljon ruvnnu.
Utsi deattuha ahte manne ferte leat innovatiiva ja čađat buktit ođđa dieđuid vai mearrideaddji eiseválddit duođaid jáhkkit sin buvttademiide ja filbmamuitalusaide.
– Mun in láitte, eai ge leat skandálat mielde go deaivvadan fápmo olbmuguin. Mis filmainstituhtas leat vihtta jagi plánat ja nu politihkkárat dihtet mii leat min buhkes áigge mihttu, muitalusa Utsi.
Filmmat leat bivnnut ja ođđa ráiddut bohtet
Sámi filbmainstituhtas leat vásihan mo sin filbmaráidu "Seven Sámi Stories" lihkostuvai bures ja dát filmmat leat čájehuvvon miehtá máilmmi. Dál lea Amanda Kernell ođđa filbma "Sameblod" maid ožžon hui ollu rámi stuorra máilmmis.
– Kernell bargu duođašta ahte ođđa filbmabuolva lea buvttadišgoahtán filmmaid. Dál leat mii Sámis nai plánemin ja čállimin nuppelohkái ođđa guhkesfilmmaid, muitala Utsi.
Son lohká ahte sámi filbmabuvttadeamit šaddet boahtte áiggis stuorra kulttorbuvtta mas lea alla kvalitehta.
– Go ná stuorra lassáneamit stádabušeahtas, mii lea deháleamos mihttun?
– Mii áigut ráhkadit filmmaid, mii áigut ráhkadit TV ráidduid ja mii galgat leat njunnošis álgoálbmogiid dokumentára ja filbmabuvttadeamis. Mis ferte leat jáhkku iežamet prošeavttaide ja maŋimuš jagiid rahčamušat han duođaštit, ahte mii nagodat jos mearridat, lohká Utsi.
Son mojohallá ja muittuhastá velá ihttá stuorrá sámi filbma dáhpáhusa go thriller-ráidu "Midnattsol" das lea premiere ihttin Gironis, Ruoŧas.
– Dá lea internašunala filbmaovttasbargu. Fránskka ja ruoŧa filbmadahkkit leat ráhkadan dán ráiddu Sámis. Min servodat lea dinen ruđaid ja máilmmi geahččit - sii fas oidnet makkár lea Sápmi ja dát ráidu "Midnattsol" buktá ođđa vejolašvuođaid, nu jáhkká Anne Lajla Utsi.
