Pedar Jalvi lei riegádan 1888 suomabealde Deanuleagis. Su gástanamma lei Piera Klementinpoika Helander. Sámegillii gohčodedje su Lemahaš Biehtárin, muhto go son vulggii skuvllaid vázzit máddeleabbui Supmii, de rievdadii son namas máŋgii.
Válddi oahpaheaddjioahppu Jyväskylás
Dan áigge go son lei oahpaheaddjioahppus de searvvaid son maid doibmii, mii dagahii dan ahte šattai rievdadit namas Pedar Pohjansädenin. Ja dan áigge go lei oahpaheaddji oahppus máddin, de fuomášišgođii son iežas sámi duogážis. Su jurdagiin ealáskedje poletihkalaš jurdagat, ja de čálligođii son divttaid sámegillii.
Poletihkka duogážin divttas «Muohtačálmmit»
Vuokko Hirvonen muitala Lemahaš Biehtára divttain vuohttit poletihkkalaš morráneami. Earret eará muohtačalmmit divtta lohpas mas čállá ná:
"Giđđabeaivváš muođuid ovddas suddet smávva muohtačalmmit - šaddet johkan, jávrin, mearran - Stuoris dalle lea daid fápmu".
Dáid sániid lohká Hirvonen leat čuorvvasin ja muittuheamen olbmuide das ahte go ovttas barget, de dat buktá buriid sámi álbmogiid.
Pedar Jalvi áiggui jorgalit Matti Aikio girjjiid sámegillii
Pedar Jalvi ja Matti Aikio ealiiga seamma áiggis, ja leigga maid fulkkežat, muitala Hirvonen. Jalvi lei oahppan dárogiela, ja nu leige mearredan jorgališgoahtit Matti Aikio girjjiid sámegillii, muhto dávda ii addán sutnje vejolašvuođa dan dahkat. Son buohcagođii ja šattai Anára buohccevissui gosa maid jámii borgemánu 8.beaivvi 1916. Anárii lea son maid hávdáduvvon. Lemehaš Biehtár, Pedar Jalvi, ii šaddan eanet go 28 jagi boaris.