– Sámi Grand Prix lágiduvvo, muhto doalut eai šatta Báktehárjjis. Luođit ja lávlagat leat báddejuvvon ja rávdnjejuvvojit neahta bokte, muitala buvttadeaddji Ol Johan Gaup NRKii.
Oassálastit leat sii geat diibmá livčče galgat mielde.
– Mii fertet ná dahkat vai čuovvut njuolggadusaid mat gusket koronaeastadeapmái, čilge Gaup Guovdageainnu lagasradioi (GLR).
NRK mielde lágideame SGP
Dán jagi lea maid NRKa mielde lágideami doaluid.
Sámi Grand Prix sáddejuvvo NRK2:s NRK TV:s ja NRK Sámi Rádios, beassášlávvardaga, cuoŋománu 3. beaivvi, tii. 18.00.
Geahččit ja guldaleaddjit sáhttet maiddái jienastit iežaset jiellahiid.
NRK Sámi prográmmaredaktevrras Carl-Gøran Larssonis leat alla vuordámušat lágideapmái.
– Sátta šaddá Beassášlávvardaga min digitála lávddiin, nu go NRK TV neahttaspilláris, dieđusge NRK Sámi neahttasiiddus ja háliidat maid ahte gullo rádios.
– Diibmá ii lágiduvvon SGP koronadilálašvuođa dihte, ja go dán jagi ii leat ge vejolaš čađahit doaluid fysalaš gehččiin de lea erenomáš dehálaš ahte addit dán fálaldaga sámi álbmogii.
Dá leat juoiganoasi oasseváldit
- Deaddil govvii ja geahča govvaráiddu
Nils Lars Eira lea okta oassálastin dán jagi, ja lea maid hárjánan juoigi gii lea máŋgii oassalastan Sámi Grand Prixas.
Dán jagi šaddá gilvu earálágan go muđui.
– Dat masa lei ráhkkanan lei ahte šaddá njuolggorávdnjen, ollu olmmoš, hirbmat somá ja márkan, dál šaddá measta dego beare fitnat juoigamin studios ja de gearggat eret, dadjá Eira.
Oassalastit báddejuvvojit ovdagihtii ja dan oktavuođas lea Eiras okta sávaldat.
– Jus mii nu teknihkalaš boasttuvuođaid geavvá báddedettiin, de gal galggašii beassat ođđasit báddet vai oassálastiid kvalitehta lea ovtta dásis, dadjá Eira.
- Loga:
Dá leat lávlunoasi oasseváldit
- Geahča govvaráiddu
Unna festiválaš
Dán jagi lea 50 jagi áigi go vuosttaš beassášriemut lágiduvvojedje Guovdageainnus.
Jurdda lei lágidit stuorra doaluid ja dán láhkái čalmmustahttit ávvudeami.
Nu almmatge ii šatta.
– Mii áigut ávvudit, muhto eat nu stuorrát go álggus jurddašuvvon, čilge Gaup GLR:ii.
Buvttadeaddji čilge, ahte buot beassášdoaluin lea koronaeastadeapmi guovddážis.
– Eanaš doalut leat olgun go dalle čáhket eambbo olbmot. Siste maid smávit doalut, muhto dáin doaluin leat garra ráddjemat gallis dohko besset, muitala Gaup.
- Loga maid: