Juovlaskeaŋkkat, deaivvadeapmi ja giellaarena

Sámis lea dávjá nu ahte jus áiggošit geasuhit eará sápmelaččaid, de bovde sin doaluide mas lea sámi duodji ja sámi mállásat.

Dán álkes málle leage Oslo sámiid searvi válljen čuovvut.

Oslo sámeviessu lei oainnat spagga dievva mannan lávvardaga go juovlamárkanat lágiduvvojedje guđát geardde.

– Ollugat leat finadan mu vuovdinbáikkis ja gálvojohtu lea leamaš buorre, čilge Anna Karoline Ciucka Sjursen.

Sjursen lea eret Stuorra Liidnevuonas Álttá suohkanis. Juovlamárkaniin son vuvddii čoavddarieggáid, vuoddagiid ja eará mii goikkehiidda gullá.

– Munnje mearkkašit dát juovlamárkanat olu. Dáppe sáhttá čájehit sámi máŋggabealátvuođa oaivegávpogis ja ahte mii ain leat dáppe, lohká Sjursen.

– Oastit juovlaskeaŋkkaid

Vuosttaš juovlamárkanat dollojedje jagis 2017, go Oslo sámeviessu fárrii dálá čujuhussii guovdu gávpoga.

Ragnhild Figenschou lea boahtán juovlamárkaniidda oastit juovlaskeaŋkkaid fulkkiidasas ja ustibiidasas.

Son čájeha NRK reportarii čáppa giehtabátti, maid oastá juovlaskeaŋkan muhtin oahppásii.

– Ale fal TVs gal čájet makkár juovlaskeaŋkka mun oasttán, Figenschou ávžžuha.

Rauni Helena West čilge, ahte dát lea gullan Inga Juuso rohkkái. Muđui son vuovdá iežas duddjon datnebáttiid, beallječiŋaid, čeabetbáttiid, suohkuid, fáhcaid ja iešguđet lágan gođđon dávviriid.

– Dáppe lea hui hoahppu ja hirbmat hušša. Hirbmat somá. Gálvu lea duođai bures johtán. Hárve ná bures lean vuovdán. Várra olbmot leat veattástuvvan ruovttus pandemiija maŋŋá, árvala West.

– Giellaarena

Oslo sámiid searvvi jođiheaddji, Tor Gunnar Nystad, dušše mojohallá go nu olu olbmot leat boahtán.

– Mii lágidat márkaniid guktii jahkái, juovlamárkaniid ja giđđamárkaniid. Dát leat hui dehálaš sihke giellaarenat ja deaivvadanbáikkit dáppe Norgga oaivegávpogis, čilge Nystad.

Son lohká alcces maid márkaniid mearkkašit olu.

– Mii leat ollugat Oslo sámiid searvvis geat astoáiggis bargat dáid doaluid lágideamen. Danne lea vuogas go dása geavahat nu olu áiggi, ahte olbmot bohtet ja orrut liikomin doaluide, lohká Nystad ja mojohallá.

Oslo sámeviessu fárrii Dronningens gate 8B čujuhussii viđa jagi dassái. Das rájes lea beroštupmi eanaš sámedoaluide sakka lassánan.

– Dat lea buorre deaivvadanbáiki. Maŋŋá go fárriimet deike guovdu gávpoga, de lea viessu leamaš hui bivnnut. Jámma lea nu, ahte olbmot bohtet nu guhká go mii nagodat lágidit buriid doaluid, čilge Nystad.

– Olu bargu, muhto hui somá

Nubbi moddjás olmmoš lea Elle Kirste Johnsen. Son lea maid okta juovlamárkana eaktodáhtolaččain.

– Mu mielas lea hui somá dáppe. Olu bargu, muhto hirbmat somá go bohtet nu olu olbmot, mojohallá Johnsen.

Su bargu lávvardaga lei kafejás guossohit borramušaid ja juhkamušaid gussiide.

– Munnje mearkkašit juovlamárkanat hui olu. Orru leamen dehálaš čájehit sámevuođa dáppe Oslos. Olbmot besset oaidnit makkár sámi dávvirat mis leat dáppe ja oastit fiinna juovlaskeaŋkkaid, čilge Johnsen.