Kursa loahpahuvvo čájálmasain, mii čájehuvvo Guovdageainnu kulturviesus duorastaga 4.6. dii. 18:00.
Máŋggabealát čájálmas
Measta juohke gaskavahku kursaálggu rájes guovvamánus leat oasseváldit stoahkan iešguđege teáhtervugiiguin ja neavttárteknihkalaš hárjehusaiguin.
Kursajođiheaddji Ingá Márjá Sarre lea hui duhtavaš beroštumiin maid mánát leat čájehan. Son muitala ahte ii leat gárvves teáhterčájálmas maid sii čájehit, muhto iešguđetlágan oasit sin barggus maid leat dahkan kurssas.
– Lea dehálaš ahte váhnemat ja earát besset oaidnit dán barggu maid mánát leat bargan. Čájálmasain maid mii dal čájehit leat dušše vahkku bargan, lea nu gohčoduvvon «work in progress».
Son muitala ahte sii lea bargan earret eará luondduelemeanttaiguin dolain, eatnamiin, áimmuin ja čáziin. Sii leat bargan teáhterkoarastallamiin, lávdejoavkku ovttasbargguin, ja gorutgielain ja jietnageavahemiin. Sii leat maid bargan diktaosiin, mas leat Niillas Holmberga divttat.
Stuora beroštupmi
Leat leamaš eanemusat badjel 40 máná ja nuora kurssas. Dál duorastaga leat 18:s lávddis.
– Sii illudit čájehit čájálmasa.
Mánát ja nuorat eai leat ovdal neaktán. Lea maid vuosttaš geardde go Sarre doallá mánáide ja nuoraide kurssa.
– Lea leamaš hui hástalus ja hui somá. Lean oahppan olu dáinna, maiddái iežan birra. Lea hui gáibideaddji leamaš go nu olu mánát leat leamaš mielde, muhto lean oahppan pedagogihka geavahit, muitala Ingá Márjá Sarre.
