Diimmá oláhus mii lei 752 báhččon ealli, ii leat mihkkege dan ektui mii dál báhččui.
Oktiibuot báhččoje dán čavčča bivddus Finnmárkkus 805 ealgga. Dat lea 53 ealli eambbo go diibmá. Olles viđa suohkanis lei ođđa oláhus, namalassii Kárášjogas, Guovdageainnus, Deanus, Čáhcesullos ja Davvesiiddas.
Unnidit ealgalogu
Eanemus ealggaid lei lohpi báhčit Deanus, oktiibuot 280, ja bivdit nagode báhčit 219.
Diibmá báhče Kárášjogas 165 ealgga. Dál báhče 196. Ja dat lea measta 75 proseanta bivdolobis.
Finnmárkkuopmodaga, FeFo, fuođđobagadalli, Bjørn Vidar Johnsen, doaivu siva ođđa oláhussii leat go sii geahččalit unnidit ealgologu fylkkas, ja dainna lágiin diktet eambbo báhčit. Finnmárkkus han leat soames guovlluin dál badjelmeare ealggat.
Giksin
Kárášjogas ja Deanus leat maŋemus áiggiid laskan badjelmeare ollu ealggat, ja muitit ge ahte mannan dálvvi ledje feara gos dien guovtti suohkanis ealggat olles giksin ja bohte gitta giliide ja olbmuid viessoseinniid lusa.
FeFos eai vel dieđe sihkkarit leat go lihkostuvvan unnidit dán čavčča bivddus doarvái ollu.
- Davágeahčen Kárášjoga nagode eambbo báhčit go lulágeahčen, lohká Johnsen.
Doppe gos eanemus proseantta ealggaid báhče Finnmárkkus lea Gáŋgaviika, olles 100 proseanta ealgga. Muhto ii lean ge doppe gal lohpi báhčit earágo njeallje ealgga.
