– Jus galgá geahččat mii lea heivvolaš ja ii, na de ii leat mu mielas heivvolaš bidjat ruvkebázahusaid merrii, vástida Beaska Niillas moaitámuššii.
- Loga maid:
Norgga Sámiid Riikkasearvvi (NSR) sámediggeáirras manai mannan vahku Sámedikki dievasčoahkkimis sárdestullui ja gaikkodii áigumuššiehtadusa maid Sámediggi vuolláičálii Nussira ruvkefitnodagain jagi 2010.
Ovddeš sámediggepresideanta Egil Olli Bargiidbellodagas moaitá áirasa láhttenvuogi.
– Dohkkehan ahte dálá politihkkáriin lea eará oaidnu dál go mis lei dalle. Sii sáhttet maid cealkit eret šiehtadusa, muhto sámediggeáirasat eai galggaše nie láhttet sárdnestuolus, dadjá Olli.
Nussir-ruvkefitnodaga njunuš lea Kanadas, ja ii loga dovdat ášši go NRK Sápmi jearrá sus movt son oaidná dán ášši. Easka gaskavahku rájes, go olle ruoktot fas, lohká sáhttit kommenteret ášši.
– Olahin dan maid áigon
Sámedikki dievasčoahkkima čoahkkinjođiheaddji Mathis N. Eira moittii maid Beaska Niillasa. Son oaivvildii ahte nie ii heive láhttet parlamentáralaš oktavuođas.
Muhto sámediggeáirras čujuha dasa ahte son sárdnidii čábbát. Áidna maid son dagai lei gaikkodit báhpira.
– Čoahkkinjođiheaddji bargu lea čuovvut njuolggadusaid ja dan gal vuorddán ahte son dahká. Iežan mielas in rihkkon parlamentarisma. Mun sárdnon čábbát. In sárdnon unohisvuođain. Gaikkodin dušše báhpira, čilge son.
Politihkkár lea duhtavaš maid olahii bábergaikkodemiin.
– Vuođđojurdda mus lei boktit olbmuid ja dan mun dahken - sárdnestuollu dat gal ferte gierdat dien mađe, dadjala Beaska Niillas.
Maŋŋel NSRa-politihkara symbolalaš dagu mearridii Sámedikki eanetlohku mannat vuostá Nussira ruvkeplánaid Fálesnuorris.
– Soahpamušat eai leat buorit Sámediggái
NSR-politihkkár čujuha dasa ahte dakkár soahpamušat sáhttet geavahuvvot eahperehálaččat ja dan dihte ii leat buorre ahte Sámediggi soahpá priváhta fitnodagaiguin dakkár áigumuššiehtadusaid.
– Arctic Gold njunuš galgá leat fáipon fitnodaga generalčoahkkimis Sámedikki áigumuššiehtadusain ruhtadeddjiide ja sárdnidii ahte fitnodagas lea ovttasbargu Sámedikkiin ásahit ruvkki Guovdageidnui. Dá lea ovdamearka manne mu mielas Sámediggi ii berreše ovttasbargat fitnodagaiguin, lohká Beaska Niillas.
- Loga maid:
– Oaivvildat go ahte Sámediggái ii oba leatge buorre ovttasbargat fitnodagaiguin?
– Na dan ferte árvvoštallat áššis áššái, muhto vuođđojurdda berrešii leat ii. Nussir-áššis ovdamearkka dihte lei nu ahte boazodoallit eai háliidan šiehtadusa, ja go Sámediggi de boahtá ja vuolláičállá šiehtadusa, de ii čuoja dát mu bealljái nu bures.