NRK Meny
Normal

Doavtterfálaldat buorrána

Skánit, Dielddanuorri ja Evenášši gielddat ovttastahtte dearvvašvuođafáladagaset. Dát oktasaš medisiinnalaš guovddáš rahppuige otne.

ETS medisinske senter

Sámediggeráđđi Ann Mari Thomassen, Skániid sátnejođiheaddji Einar Aune ja guovddáža váldodoavttir Barbro Hætta rahpamis mielde.

Foto: Kjersti Myrnes Balto

EDS medisiinnalaš guovddáš ásahuvvui Evenáššái Skániide, mii lea maiddái dán oktasašbarggu hálddhusgielda.

Dát golbma Mátta Romssa ja Nordlándda gielddat háliidit nannet dearvvašvuođafalaldagaset. Ovdal leamašan guđege gielddas okta dahje eanemusta guokte doaktára. Dál gielddaid ássit besset válljet ovcci doaktára gaskkas fásttadoaktára. Guovddážis barget 6 fásttadoaktára, 2 doavtter hárjehalli, gielddadoavttir ja vel eará dearvvašvuođabargit.

Oktasaš gielddadoavttir

Gielddain lea maiddái oktasaš gielddadoavttir. Barbro Hætta lea bargan dán ámmáhis guovvamánu 10. beaivve rájes. Hætta lea áidna sámegielat doavttir dán guovddážis. Ja vaikko son ii beaivválaččat barggage njuolga doavtterámmáhis, de son sávvá, ahte áiggi miel beassá ovddidit maiddái dáid gielddaid sámegiellagiid dearvvašvuođabálvalusaid.

–Stuorát guovddážii lea álkit oažžut doaktáriid. Go lea stuorát bargobiras, de dat hásttala eanet ja lea maiddái suohttasut bargat. Dalle eai heaitte nu álket, dadjá Hætta.

Guldal ášši:

Reporter Liv Inger Somby

Guovddážá huksen mávssii 3 miljon ruvnnu ja dat galgá fállat dearvvašvuođabálvalusaid 5500 olbmui.