2023 rájes la Knut Hamsun joarkkaskåvllå læhkám oassen gæhttjalimprosjevtas ressurssaskåvllån julevsáme giellaj ja kultuvrraj.
Dálla l Nordlánda fylkadigge mierredam skåvllå galggá liehket ressurssaskåvllå stuovvásit.
– Dálla lip gárvvása dát galggá liehket årnik mij bissu.
Dav javllá åhpadusá ja máhtudagá fylkaráde Joakim Sennesvik (Ob) NRK:aj.
– Galggap ájn sjaddat
– Dan diehti gå miján la åvdåsvásstádus, sihke Duohtavuoda- ja semadimkommisjåvnå gáktuj, ja stuorra sebrudakdåjmadiddjen vaj suodjalip ja åvddånahttep sihke sáme gielav ja kultuvrav, javllá sån.
Sennesvik subtsas sij li árvustallam ålles Nordlándav tjoahkkáj ja lij luondulasj Knut Hamsun joarkkaskåvllå oattjoj dav rållav gå skåvllå l nanos julevsáme guovlon.
Åhpadusá ja máhtudagá fylkaráde Joakim Sennesvik (Ob).
Foto: Vetle Knutsen / NRK– Makkár bargov dahká Knut Hamsun joarkkaskåvllå julevsámegiela åvdås?
– Akta bielle la gå dálla lip ásadam birrasav sáme giellaåhpadiddjij, mij la nanniduvvam dájt maŋemus jagijt madi lip adnám dáv gæhttjalimprosjæktan, javllá Sennesvik.
Sån duoddi:
– Dat galggá ájn sjaddá, ja oadtjop nanos fáhkabirrasav mij aj máhttá viehkedit dåjt ietjá joarkkaskåvlåjt. Ij dåssju Nordlándan, valla aj ålles Vuonan.
Gæhttjalimprosjevtan lidjin dá ulme Knut Hamsun Joarkkaskåvllåj:
- Nannit julevsáme gielav, kultuvrav ja identitehtav joarkkaskåvlåjn.
- Viehkedit dárkestittjat ja åvddånahttet buorre åhpadusáv julevsámegielan.
- Doarjjot bargov sáme gielav, kultuvrav ja identitehtav låpptitjit gájkka skåvlåjn Nordlánda fylkasuohkanin.
Knut Hamsun joarkkaskåvllå.
Foto: Elena Junie Paulsen / NRK– Dát lij dárbulasj doajmma
Vibeke Larsen la Nordkalottfolketa presidænntaoajvvadus ja javllá NRK:aj dát la vuogas.
– Dát lij dárbulasj doajmma julevsámegiela hárráj. Fylkadigge ánssidi gájkka rámpojt gå dav dahki ja åvdåsvásstádusáv válldi julevsámegielas joarkkaskåvlå dásen.
Vibeke Larsen (Nkf) tjåhkkåj Sámedikken ja la Nordkalottfolket belludagá presidænntaoajvvadus tjavta válggaj.
Foto: Lemet Johanas Nystad / NRKSubtsas julevsámegiella l akta dajs unnemus sámegielajs ja dåssju gallegasj åhpadusinstitusjåvnå li.
– Joarkkaskåvlå dásen la Knut Hamsun joarkkaskåvlå. Dan diehti l ájnas sij oassálassti ja li ressurssaskåvllå, tjuottjot Larsen.
Dálla suv mielas vierttip rahtjat vaj vuodoskåvllå Ájluovtan Hábmera suohkanin galggá julevsáme ressurssaskåvllån sjaddat.
– Nuorttasámegielan la miján stáhta dåjma, stáhta skåvlå. Oarjjelsámegiela hárráj la miján sæmmi, valla julevsámegiela hárráj ælla makkirak stáhta dåjma, javllá sån ja joarkká:
- Dát la ihkeva ájnas mihttomierre julevsáme giellaj. Ja boahtte oajbbom la Ájluovta skåvllå.
Ruvva gárves nammamålssomij?
Ragátmánon åvdep jage mierreduváj Nordlánda fylkasuohkan sjaddá Knut Hamsun joarkkaskåvlå namáv målssot.
Dát bådij åvddån gå fylkasuohkan tjavtjan javllin ándagis skåvlå åvdep sámeoahppijda. Dalloj muhtema subtsastin ietjasa vásádusáj birra skåvlån.
– Máhtijma nabdostuvvat «jævla lapper». Mujtáv vinndegijt gåbttjin gardijnaj ja uvsajt lássijin årruhattjajn avta bále gå siján lij fæssta. Dákkir ássjijt, giehtoj åvdep oahppe NRK:aj.
Åhpadusá ja máhtudagá fylkaráde Joakim Sennesvik (Ob) aktan fylkarádijn Svein Øien Eggesvik gå lijga Ájluovtan javlatjit ándagis dijmmá tjavta.
Foto: Vetle Knutsen / NRK
Joakim Sennesvik giehttu dal namma målssu åvddål skåvllå álggá tjaktjaj.
– Ja tjavtjan la aj skåvlå 50-jage ávvudallam, danen jáhkkep vuogas la gárvedit dav ávvudallamij.
– Le gus diján soames namá ma dal dágástaláduvvi?
– Fylkkasuohkana bieles la læhkám ájnas dát la prosæssa mij guosská bájkálattjat, ja ihkap sierraláhkáj oahppe skåvlån lulun oadtjot sijá ájádusájt juohket. Danen ælla miján dálla makkirik oajvvadus.
