Sámi festivála Márkomeannu ii lágiduvvo dán jagi. Diibmá mearridedje dán jagi váldit bottu go eai lean doarvái guovddášbargit festiválas ja ekonomiija dihte. Dát sámi festivála láve lágiduvvo Gállogiettis Skániin. Festiválajođiheaddji Ellen Berit Dalbakk lohká ahte sii geahččalit vel oažžut bargiid doaimmaide ja mearridit borgemánus ahte šaddá go Márkomeannu boahtte jagi.
Sámi allaskuvllas oidnet, ahte dál lea stuorra beroštupmi oahppat sámegiela.
Ollugat leat ohcan sámegiela easkkaálgi kursii, man gohčodit SÁL1 ja SÁL2.
Buohkanassii leat 70 ohcci.
– Min váttisvuohta lea, ahte mis eai leat doarvái fágaolbmot geat sáhttet oahpahit sámegiela, muitala Sámi allaskuvlla rektor Liv Inger Somby.
Son lohká allaskuvlla dál bátnegáskki bargat strategalaččat gávdnat olbmuid geat sin lusa sáhtášedje boahtit bargui ja oahpahit sámegiela easkkaálgiide.
– Jus oažžut vel ovtta dahje guokte oahpaheaddji, de sáhttit duppalastit studeantalogu. Dalle eai leat dušše 15 studeantta, muhto 30, čilge Somby.