Ođđa organiseren das movt ráđđehus bargá sámiáššiin
– Ráđđehus lea dál geahččaleamen eanet geatnegahttit daid sierranas fágadepartemeanttaid bargat sámi guoski áššiin. Dál ii galgga šat dušše ráđđehusa álgoálbmot ossodat Gielda- ja guovlodepartemeanttas gozihit sámeáššiid.
Nu logai ráđđehusa sámeáššiid stáhtačálli Nancy Charlotte Porsanger Anti Guovddáš bellodaga riikačoahkkimis Tråantes.
Ná geahččalit sii oahpahit buot departemeanttaid ahte sámeáššiid meannudeapmi lea maid seamma dábálaš ja normála bargu departemeanttas, go buot eará áššiid meannudeapmi, čilgii son.
Dál fargga almmuha earret eará Máhttodepartemeanta dieđáhusa oahpaheddjiid rekrutteremis ja gelbbolašvuođa nannemis.
Boahtte jagi lea ges sámiid dearvvašvuohta ja eallindili kárten guovddážis.
– Dán ođđa organiserema ovddas leat ožžon sámiid beales olu rámi, logai Porsanger Anti riikačoahkkima sárdnestuolus.
Son ja eará sámi áirasat bellodaga riikačoahkkimis leat maid lokten ovdan sámiid cuiggodeami das movt ráđđehus lea meannudan Alimusrievtti duomu Fovsen-áššis.