Erke ohcala dáža politihkkáriin eanet áddejumi sámiáššiin
Guovddášbellodaga parlamentáralaš jođiheaddji Sámedikkis, deatnulaš Elisabeth Erke, ohcala dáža politihkkáriin stuorát áddejumi sámeáššiin.
Bellodaga riikačoahkkimis Tråante gávpogis cuiggodii son garrasit ráđđehusa láhttenvuogi Fovsen-áššis.
– Ii leat man ge láhkai dohkálaš ahte sámi nuorat fertejit Osloi boahtit miellačájehemiid čađahit oažžun dihtii ministariid ja stáhtaministara fuomášumi áššái, logai son riikačoahkkima sárdnestuolus.
Erke deattuhii ahte olu sámiide lea leamaš lossat oaidnit dan badjelgeahččanvuođa maid eiseválddit čájehit Fovsen-áššis.
Son lea eahpidišgoahtán Norgga njunušpolitihkkáriid dáhtu áddet maid man duođalaš ášši lea boađi boađi Stuorradiggái, nammalassi Duohtavuođa- ja seanadan kommišuvnna raporta dáruiduhttima váikkuhusain Norggas.
– Ledjen vuordi ahte kommišuvnna vuđolaš bargu, mii lea bistán vihtta jagi, dál livččii boktigoahtán ja lasihišgoahtán sámeáššiid máhtu Norgga politihkkáriin, logai son riikačoahkkimii.
Son maid deattuhii ahte buot losimus lea leamaš vásihit ahte muhtun politihkkárat vel leat evttohan lágaid ja konvenšuvnna sihkastit mat nannejit olmmošvuoigatvuođaid ja álgoálbmotvuoigatvuođaid.
– Go vikkahit ahte sámit eai leat álgoálbmogat, de lea die ge ovdamearkan dasa movt dáruiduhttin ain joatkašuvvá vel dál ge, logai Erke iežas bellodat ustibiidda jahkečoahkkimis.
Beannot jagi dassái celkkii ovttajienalaš alimusriekti ahte bieggaturbiinnat Fovsen njaarke orohagas leat lobi haga huksejuvvon ja rihkkot olmmošvuoigatvuođaid. Les på norsk.