Guovdageain nuoraidskuvlla rektor, Ellen J Sara Eira, gohčoda dán buorrin ođasin.
Sámediggeráđi strategelaš plána (2009 - 2012) áiggošii váldit vuhtii oahpponeavvodili dan boahtte gomma jagis, mii guoská mánáidgárddiide, vuođđooahpahussii ja dasa lassin erenoamáš heivehuvvon oahpponeavvuide.
Juksat máhttoloktema
- Dáinna plánain de livčče ulbmil juksat mihtuid mat leat biddjon máhttoloktema oktavuođas, čuožžu čállon plánii.
Plána ulbmil lea oppalohkái buoredit buot beliid mat guoskkažit oahpponeavvobuvttadeapmái, leš dal lágádusaid-, ráhkadeaddjiid -dahje čálliid dilis sáhka, dahje buktagiid márkanfievrrideamis.
Plána namaha earret eará ahte bargoeavttut buvttadeaddjiide eai leat geasuheaddjit, ja nu váilot ge girječállit ja girjejorgaleaddjit.
Liige máksu lágádusaide
Lágádusaide árvala ráđđi liigemávssu olggosaddima ovddas ja go masset sisaboađuid girjevuovdimis.
Vaikke vel rektor Sara Eira mielas lea ge dá buorre ođas, de ii galggašii ráđđi ja Sámediggi doaivut ahte dilli dan dihtii šaddá áibbas buorre.
- Dát lea buorre ođas, muhto sávašin ahte politihkárat eai nohkašii dáinna áššiin diesa, go doaivugohtet sii leat dál dahkan dan maid sáhttet. Sii fertejit aŋkke bargat eambbo ovddasguvlui oččodit oahpponeavvuid, oahppogirjjiid sámegillii buot dásiide vuođđoskuvllas, lohká Sara Eira.
Nuvttá girjjit 2 jagi geahčen
Jus dát plána dohkkehuvvoš Sámedikkis, de lea vuosttas nuvttá girji dahje oahpponeavvu fidnemis guovttejagi geažis, lohká Sámediggeráđđelahttu Jørn Are Gaski.