Nuorra nieida liiko lávlut sámegillii

17-jahkásaš Anne-Laila Sommerseth dáidá leat dat okta ja áidna nuorra Porsáŋggus guhte almmolaččat lávlu sámegillii. Sámi álbmotbeaivvedoaluin Leavnnjas son lávllui golbma lávlaga, álggos Sofia Jannok lávlaga "Liekkaš", dasto Mari Boine lávlaga "Elle" ja loahpas vel Berit Margrethe Oskal lávlaga "Vilges buvssat".

Anne-Laila Sommerseth

Arnfinn Aslaksen, Irene Persen, Anne-Laila Sommerseth

Foto: Aina Borch

Anne-Laila Sommerseth lea álo lávlun muhto almmolaččat son lávlugođii Leavnnjas dalle go lei 12-jahkásaš 2011:s. Vaikke musihkka álo lea čuvvon su de lohká ahte ii dattege musihkka šatta su eallingeaidnu.

Dehálaš ahte sámi musihkka gullo

Anne-Laila Sommerseth, Aina Borch

Anne-Laila Sommerseth ja Aina Borch

Foto: Arne Ivar Johnsen / Nrk

Son lávlu sámegillii ja lohká leat dehálaš ahte sámi musihkka gullo go dat han maid čuodjá oalle čábbát. Maŋŋŋá go lávllui sámi álbmotbeaivvedoaluin Leavnnjas gieskat de leat olbmot rámiidan su lávlunčehppodaga, maiddái Porsáŋggu gieldda sátnejođiheaddji Aina Borch gullui rámiideamen su. Lea somá gullat ahte olbmot liikojit dan maid son bargá, dat nanne iešdovddu ja dat lea dehálaš dadjá son. Porsáŋggus eai leat galle nuora geat almmolaččat lávlut sámegillii ja dáidá leat nu ahte Anne-Laila lea dat okta ja áidna gii nu bargá dien gielddas.

Sámi musihkka ii gula nuoraide

Go lea sáhka sámi musihka birra de lohká 17-jahkásaš Anne-Laila Sommerseth ahte ii son gal muđuid guldal sámi musihka. Dát musihkka gullá eanet sidjiide geat leat boarrásat go son, dat gullá ovddit buolvvaide oaivvilda son.

Anne-Laila lávlu sámegillii daningo lea bealle sápmelaš, áhčči lea eret Guovdageainnus ja sámegielain son maid lea bajásšaddan. Lohká ovdal hállan sámgiela muhto hállangiela son lea dađistaga vajáldahttán go lea fárren eatni mielde.