Boahtte mánnodat rájes besset mánát illudit go álgá Binnabánaš. Binnabánnaš lea dego dábálaš golmmajahkásaš, hui diehtoáŋgir ja virkui.
Stoahkalas Binnabánnaš
Binnabánnaš stoahká prográmmain ivnniiguin, loguiguin, ja duos dás maid stoahká ahte lea muhtinlágan ealli. Son lea maid hutkái, nu go jo lávejit leat mánát, nu ahte dát vávvá sáhttá vaikko maid fuobmát bargat. Son maid dávjá dovdnesta. Dovdnen lea unna luođáš, mii lea heivehuvvon ja álkiduvvon mánáid várás.
Mánáid-TV áigumuš lea nannet sámi mánáid kulturgullevašvuođa, mánáid vuosttaš giellaoččodeami ja ealáskahttit sámi luohtevieruid nu go dovdnema.
"The New Teletubbies" vuosttaš geardde čájehuvvo Norggas
Binnabánnažis oaidnit vel ođđaseamos Teletubbies sámegillii. 50 prográmma lea gárvásat čájehanláhkkái nuoramusaide, 0-3 jahkásaččaide.
Ođđaseamos Teletubbies prográmmat eai leat vel čájehuvvon Norggas, muhto vuossárgga rájes mánáid-tv fállagoahtá mánáide dán ráiddu. Ja lea maid vuosttaš geardde go oaidnit Teletubbies hállamin sámegiela. Mánáid-tv illuda dán erenoamáš fálaldaga fállat nuoramus mánáide.
Mánát dearvvahedje ođđa tv-ustiba
Mannan maŋŋebárgga finadedje lagabui čuođi máná NRK Sámis čájáhusdoaluin, mánát gehčče Binnabánnaš prográmmaid ja vel dearvvahedje Binnabánnaža. Mánát orro liikomin bures prográmmaide, sii čaibme ja háliidedje eambbo vel geahččat Binnabánnaža. Ja dát orro leamen buorre mearka go mánát dán láhkai čájehedje beroštumi Binnabánnažii, dadjá Mánáid-Tv prošeaktajođiheaddji Rikardsen.
Juohke vuossárgga dii. 17.00 oainnát Binnabánnaža ja Teletubbies NRK Superis. Ođđajagimánu rájes fállagoahttit guktii vahkkus prográmmaid nuoramusaide.Interneahtas www.nrksuper.no, dan čujuhusas maid oainnát mánáid-tv prográmmaid.