NRK Meny
Normal

Illuda go nuoraidráđđi fas boahtá johtui

Ikte mearridii Guovdageainnu suohkanstivra ahte suohkana nuoraidráđđi galgá fas ealáskahttojuvvot. Nuorra politihkkar Ann Catharina Lango mielas lea buorre go nuorain fas lea nuoraidráđđi suohkanis, ja nu maid váikkuhanvejolašvuohta.

Ann Catharina Lango

Suohkanstivraáirras Ann Catharina Lango

Foto: Berit Solveig Gaup

– Mis ii leat leamaš nuoraidráđđi. Mis lea gal nuoraidlávdegoddi, masa mii válljet politihkalaččat bellodagaid mielde miellahtuin. Nuoraidraddi ii leat politihkalaš čadnon, čilge Lango.

Heaittihuvvui jaskatvuođas

Logi jagi áigi heaittihuvvui Guovdageainnu nuoraidráđđi jaskatvuođas, iige leat diehtu man dihte. Dál leat suohkanstivrapolitihkkárat mearridan ahte dat galgá fas ásahuvvot.

Nuoraidráđđi ii galgga leat politihkkalaš ráđđi ja dasa galget válljet lahttun nuoraid 13 jagi ja 19 jagi gaskkas. Sii galget beassat buktit cealkkámušaid ja váldit ovdan áššiid mat gusket sidjiide.

Máŋga jagi ráhčan ealáskahttit

June Brita Eira

Nuoraid koordináhtor June Brita Eira

Foto: Vanja Ulfsnes / NRK

Guovdageainnu suohkana nuoraidkoordináhtor June Brita Eira, gii máŋga jagi lea rahčan ealáskahttit nuoraidráđi, lei ilus go suohkan viimmat mearridii dan dahkat.

– Dál lea hui illubeaivi. Lea nu máilmmi somá go dat boahtá fas viimmat johtui. Lea logi jagi leamaš jaskat.

Eira áigu čakčat johtit skuvllaid mielde ja muitalit nuoraide nuoraidráđi birra. Čavčča mielde válljejuvvo nuoraidráđi stivra.

– Áiggun muitalit movt galgá ráhkkanit ja movt organiseret dan. Ja de áigut čavčča mielde ráhkkanit válgga ja oažžut johtui dan.

Asttuáigge fallodagat hui dehálaš

Ann Catharina Lango jáhkká nuoraid ovddemus bargagoahtit astoáiggefálaldagaiguin suohkanis.

– Mun jáhkán olu nuoraide leat astoáiggefálaldagat hui dehálaččat. Jáhkán ahte dan dat boahtá eanemusat fokuseret. Ja mun sávan ahte dainna barget, ahte geahččalit gávnnahit gos sáhttá oažžut ruđa vai mii sáhttit buoridit min astoáiggefálaldagaid nuoraide dáppe.

GULDAL ÁŠŠI: