Nordkalottfolket ii háliit Muolkkuid-ášši geassit diggái
Sámediggepresideanta Silje Karine Muotka bivdá Sámedikki dievasčoahkkimis lobi váidit stáda Muolkkuid-áššis.
Dákkár fápmudusa ii áiggo Nordkalottfolket addit Sámediggeráđđái. Dat čielggai otná lávdegotti gieđahallamis Sámedikkis, go Ulf Tore Johansen bellodagas celkkii ahte sii hilgot ášši.
Dat mearkkaša ahte Sámediggeráđđi ii oaččo doarjaga dan guovtti stuorámus opposišuvdnabellodagas, namalassii Bargiidbellodagas ja Nordkalottfolketis.
Nordkalottfolket bellodat oaivvilda ahte lea boastut lágastit Muolkkuid-áššis.
– Go diggevuogádat geavahuvvo bissehit earáid politihkalaš áigumušaid, de dalle rihkkojuvvo earáid sátnefriddjavuođa, celkkii Johansen go ovddidii Nordkalottfolketa oaivila áššis movt čuovvolit Muolkkuid-mearrádusa.
Bellodat oaivvilda ahte Sámediggeráđđi ii leat čájehan jáhkehahttin ahte lea dáhpáhuvvan láhkarihkkun go Hámmerfeasta LNG oaččui doaibmalobi Muolkkuin.