Álttá gieldda bealis lea gergosat váldit vuostá ja vurkkodit stuorra osiid suodjalusa militearadávviriin. Jos suodjalus dohkkeha dán, de oaidná Álttá várresátnejođiheaddji Jan Martin Rishaug ahte lea áigeguovdil maiddái hukset ruovdemađi Álttá ja Davvi-Suoma Kolari gaskkii. Čoahkkimis suodjalusdepartemeanttain geassemánu 17. beaivve áigu Rishaug ovdanbuktit dán evttohusa. Rishaug oaivvilda, ahte dát lea áigeguovdil dál, jos Ruoŧŧa ja Suopma vel beassaba searvat NATO lahttun
Finnmárkku áidna manneboanda Svein Slåtsveen ballá ođđa EO njuolggadusa dagahit su váttis dillái, jus riibanáigi maniide geahpedit vahkkun nu go leat árvalan. Dalle lassána fievrogollu, ja Slåtsveen balláge ahte son ferte heaitit manneboandan, jus dát njuolggadus dohkkehuvvo.
Olbmot eai váidde politiijaide go vásihit sámevaši. Sihke Romssa ja Finnmárkku politiijaguovlluin leat dán rádjai ožžon dušše ovtta váidaga sámevašis. Sámi psyhkalaš dearvvašvuođa raporttas vástidit njealji sápmelaččas golmmas, ahte leat vásihan vealaheami sámevuođa geažil. Árktalaš universitehta Romssa UiT professor Ketil Lenert Hansen ii hirpmástuhte dát ahte nu unnán váidet politiijaide sámevaši.
