Hopp til innhold

Nav-fálaldat davvisámegillii: – Stuora geahpádus olbmuide geat dárbbašit veahki

Dál beasat sámástit Nav-bargiiguin go riŋget dohko. Sámedikki vuorasolbmuidráđđi lea váillahan dán fálaldaga guhká.

direktør NAV Troms og Finnmark, Kristin Røymo

Romssa ja Finnmárkku Nav direktevra Kristin Røymo, lea rámis sin ođđa bálvalusain.

Foto: Ronald Pulk / NRK

Loga ášši dárogillii.

Ođđajagimánu vuosttaš beaivvi rájes fállagođii NAV Ávjovárri riikkaviidosaš telefonbálvalusa.

Go riŋget dohko, de beasat hupmat davvisámegiela áššemeannudeaddjin.

– Sáhttá dávjá leat váttis hupmat hástaleaddji áššiid birra vierisgillii, mii ii leat du eatnigiella, dadjá Nav Ávjovári jođiheaddji, Berit Annette Hætta.

leder i Nav Ávjovárri, Berit Annette Hætta

Olbmuide lea álkibut hupmat váttis áššit birra iežaset eatnigilli, jáhkká Nav Ávjovárii jođiheaddji.

Foto: Ronald Pulk / NRK

Meroštallamiid mielde lea 20.000 ja 30.000 olbmos davvisámegiella vuosttašgiellan. Birrasii 70 proseantta dáin orrot Norggas.

Fálaldat lea geahččalanortnet mii bistá cuoŋománu 1. beaivvi rádjai.

Dál jo leat olu olbmot riŋgen.

– Olbmot, geat riŋgejit, leat hui ilus go besset sámástit. Sin mielas lea buorre go Nav oaidná dárbbu sámegielat fálaldahkii, dadjá Hætta.

Vurdon fálaldat

Sámedikki vuorasolbmuidráđi jođiheaddji, Kristine Julie Eira, doarju su.

– Mu mielas lea nu fiinna fálaldat. Viimmat!

Kristine Julie Eira, leder i Sametingets eldreråd 2022-2025

Vuorasolbmuide lea stuora doarjja go besset riŋget ja hupmat sámegiela, ovdalii go interneahta bokte gulahallat Nav:ain. Nu oaivvilda Sámedikki vuorasolbmuidráđđi.

Foto: Sametinget

Su mielas lea erenoamážit vuorrasiidda stuora ávkin, geain ii leat digitála máhttu. Dán fálaldaga leat sii váillahan guhká.

– Eai buohkat hálddaš dihtora ja interneahta nu bures. Mii boares olbmot liikot hupmat telefovnna bokte, dadjá Eira.

Stuora mearkkašupmi

Norgga árktalaš universitehta (UiT) sámi gielladiehtaga vuosttašlektor, Berit Anne Bals Baal mielas lea dát earenoamáš buorre ođas sámegielagiidda.

– Mun jáhkán sidjiide, geat eai hálddaš nu bures dárogiela, šaddá dál geahppaseabbo bivdit Navas veahki go dárbbašit..

Berit Anne Bals Baal

Sámi gielladiehtaga vuosttašlektora, Berit Anne Bals Baal, mielas lea Nav buorre ovdamearka eará ásahusaide.

Foto: Privat

Bals Baal jáhkká álkibun sámegielagii ovddidit iežas ášši go ii dárbbaš váttes dahje amas dárogielsániid ohcat humadettiin.

– Dušše go dieđát ahte olmmoš geainna galggat hupmat, son hupmá du eatnigiela. Dat lea stuora geahpádus.

Dál hástala son eará almmolaš ásahusaid čuovvolit Nava.

Sáhttá šaddat bistevažžan

– Mii oaidnit ahte olbmuin lea dárbu beassat gulahallat iežaset gillii. Stádas lea ovddasvástádus addit buori bálvalusa sámegielagiidda.

Dan dadjá Romssa ja Finnmárkku Nav direktevra, Kristin Røymo. Su mielas lea Nav dál gávdnan buori čovdosa, maid álggos geahččalit golbma mánu.

– Movt dán bálvalusa galgá oažžu bistevaš doaibman?

– Ahte olbmot geavahit fálaldaga. Mii fertet oaidnit ahte lea dárbu dákkár fálaldahkii.

Kristin Røymo er fylkesdirektør på NAV i Troms og Finnmark

Sámegiella galgá leat lunddolaš Nav:as, oaivvilda Romssa ja Finnmárkku Nav direktevra, Kristin Røymo

Foto: Mathias Sommerseth Kjellmo / NRK

Vuosttas vahku logut orrot čájeheame nu.

– Gaskaboddosaš logut orrot čájeheame ahte olbmuin ii leat dušše dárbu sámástit Navain, muhto ahte sidjiide lea stuorra illu go dan besset dahkat. Sii, geat leat riŋgen, leat giitalan hirbmosit fálaldaga ovddas, dadjá Røymo.

Jos orru leamen dárbu sámegielat Nav-telefovdnii, de šaddá fálaldat bistevažžan. De lea maid jurdda fállagoahtit bálvalusa eará sámegielagiidda go dušše sidjiide geat hupmet davvisámegiela.

– Nav lea oassin olbmo eallimis das rájes go riegáda ja gitta lohppii, ja mii fuolahat olbmuid miehtá riikka. Dan mii sávvat dahkat buori vuogi mielde, maiddái sámegillii, loahpaha Kristin Røymo.

Korte nyheter

  • Gjenvalgt som leder

    Inge Even Danielsen gjenvelges som leder i Norske Reindriftsamers Landsforbund (NRL) under helgens landsmøte i Røros.

    Danielsen forteller om et hektisk år grunnet flere prosesser og lovarbeid innenfor reindriften, og at dette kommer til å fortsette.

    – Det blir nok et hektisk kommende år, med blant annet reindriftsavtalen som skal behandles av Stortinget våren 2025, og selskaper som stadig ønsker om å bygge ut mer vindkraft for eksempel.

    – Det er alltid nok å ta fatt i, sier Danielsen.

    I tillegg ble også ny leder for landsforbundets ungdomsseksjon, NRL-U, valgt, der Sara Katrine Aleksandersen (23) ble valgt til leder.

    Leder i landsforbundet velges hvert andre år.

    Lederkandidater-nrl
    Foto: Ailin Maria Danielsen / NRK
  • Samisk Hus Tromsø ble åpnet med joik

    Loga sámegillii

    Den samiske joikeren Sara Marielle Gaup Beaska fikk den store æren å åpne Samisk Hus Tromsø med joik.

    Hun fremførte tre joiker, blant annet «Romssa suolu (Tromsøya)» av Ande Somby og Gaup Beaska sin egen kjente joik «Gulahallat eatnamiin.»

    I sin prolog tok gratulerte forfatteren og journalisten John Gustavsen alle samene i Tromsø med sitt nye møtested.

    Samtidig brukte han anledningen til å ta et oppgjør med den stygge måten reineier Per Kitti på Kvaløya er blitt behandlet av myndighetene.

    Aksjeselskapet Samisk Hus Tromsø ble offisielt stiftet 15. februar 2023. Eiere er Tromsø kommune, Sametinget og Troms fylkeskommune.

    Sara Marielle Gaup Beaska
    Foto: Dan Robert Larsen / NRK
  • Romssa Sámi Viessu rahppui luđiin

    Les på norsk

    Sápmelaš juoigi Sara Marielle Gaup Beaska oaččui dan stuorra gudni rahpat Romssa Sámi Viesu luđiin.

    Son juoiggai golbma luođi, earret eará Ande Somby bidjan luođi «Romssa suolu» ja Gaup Beaska dovddus luođi «Gulahallat eatnamiin.»

    Prologastis lihkuhii girječálli ja journalista John Gustavsen Romssa sápmelaččaid ođđa deaivvadanbáikkiin.

    Seammás son geavahii maid liibba cuiggodit eiseválddiid dan fasttes vuogis mo Sállira boazosápmelaš Per Kitti lea gieđahallon.

    Romssa Sámi Viesu vuođđudus ásahuvvui virggálaččat guovvamánu 15. beaivve jagis 2023. Oamasteaddjit leat Romssa gielda, Sámediggi ja Romssa fylkkagielda.

    Sara Marielle Gaup Beaska
    Foto: Dan Robert Larsen / NRK