Dál dáhtošii sámi kopija oasáža dás, sámi musihkkáriidda buorrin. John Trygve Solbakk lea sámi kopiija ovddas ovddidan gáibádusa.
Normo Jovnna luohti
Máilmmifitnodat Virgin Records lea almmuahan skearru, man namma lea "Sacred spirits", sámegillii bassi vuoiŋŋat. Virgin records buvttada maid beakkálmasaid dego Spice Girls ja Rolling Stones musihka. Dát cd lea ráhkaduvvon Hollánddas, ja buvttadeaddji lea váldán nama The Fearsome Brave. Normo Jovnna luohti lea šaddan the counterclockwise dánsalávllan.
Dinen bures
NRK Sámi Radio lea ovdal muitalan dán cd birra mii vuohččan ilmmai 1994is, ja de ođđasit fas 1997as. Dan rájes galget leat vuovdán badjel 2 millijuvnna cda. Sámi kopija rehketbihtá mielde dahká dát sulli 200 milljuvnna norgga ruvnna dietnasa.
Oasi dietnasis lea Virgin lohpidan addit ameriikka álgoálbmogiid vuoigatvuođa fondii. Muhto Sámi čálákultuvrralaš áigečállaga Sámis dieđuid mielde ii hálit foanda duođaštit lea go ožžon lohpiduvvon ruđa.
Unnán suodji
Álgoálbmogiid árbevirolaš vuoiŋŋaduojis lea dál unnán suodji. Nu guhká go ii leat čállon báhpirii, de dávjá lea váttis duođaštit geasa vuoigatvuođat gullet, ja vaikko gii sáhttá ávkkástallat das. Ovttastuvvan nášuvnnaid organisašuvdna WIPO lea bargame čielggadit mot dákkár áššiid dustet, ja Solbakk jáhkká dán barggus guhkit áigái ávkki sullásaš áššiide, vai olgomáilbmi ii sáhtte dušše váldit ovdamearkka dihte árbevirolaš sámi musihka, ja iige boađá mohttege álbmogii ávkin.
Jus Sámi kopia oččoš dan beannomiljuvnna man bivdá, de áigu dán juohkit stipeandan sámi musihkáriidda, lohká John Trygve Solbakk.