Dál servet sámiid 100 jagi ávvudouluide seminárain man professor Peder Borgen láidesta guovvamánu 7. beaivvi.
88-jahkásaš Peder Borgen, gii lea bargan Troanddima universitehta professorin 1971 rájes, son lea dál ráhkkaneamen láidestit seminára.
Dán seminárii bohtet maid olu gaskariikalaš metodistagirkolahtut. Sii bohtet danne go sámiid vuosttaš riikkačoahkkin jagis 1917 lei metodistagirkus Troanddimis.
Peder Borgen muitala iežas leat dán 100 jagi ávvudeapmái ráhkkanahttimin sosialapoletihkalaš seminára ja dán seminárii dat bohtetge sullii 30 riikaidgaskkasaš metodisttagirkolahttu.
Gaskariikkalaš metodisttagirku njunuš boahtá sámiid ávvudit Troanddimis
Borgena seminárii boahtá maid gaskariikkalaš metodistagirku okta dain bajimusain, Libertu Bautista.
Dát almmái gullá Filippiinna eamiálbmogii. Bautista galgá logaldallat semináras. Gaskariikkalaččat lea metodistagirku dál bargamin loktet eamiálbmogiid árvvu ja bivdit sis ándagassii buot vearrivuođaid ovddas, mat sin guovdo lea dahkkon.
Dál ferte buorádusa dahkat, oaivvildit metodisttat.
Gii dát 88 jahkásaš professor lea
Peder Borgen lea Skedsmo/Lillestrøm guovllus eret, son válddii nuorran teologalaš oahpu, báhpaoahppu, ja studerii viidáseabbot nu ahte loahpa loahpas dohkkehuvvui professorin Troanddima Universiteha oskudieđalaš instituhttii maŋŋil go Norggas rievdadedje lága 1971s.