Anny Johansen lea riegádan ja bajásšaddan Áigiris mii lea smávit giláš Porsáŋggu vuona oarjjabealde. Anny ássá Leavnnjas gos juo lea guhkká orron. Son muitala ahte Porsáŋggus lea duođaige stuorra beroštupmi čohkkát ja gođđit sihke fáhcaid, suohkkuid ja eará dárbbašlaš bivuid. Anny muitala ahte lei eatni ja goappašat áhkkut geat oahpahedje su gođđit mánnán juo.
Mánnán juo oahppan gođđit
Katrine Ghitti lea riegádan ja bajásšaddan Skuvvanváris ja muitala iežas 6 jahkásažžan juo oahppan gođđit. Vaikke ii leat nu dárbu gođđit bivuid de lea gođđin sudnuide šaddan dáhpin man ii leat vejolaš guođđit. Dát ášši lea dahkkon Leavnnja gávppašanguovddážis dan ovddeš DnB dálus gos gieskat lágiduvvojedje juovladuodjemárkanat.