Loahpahit bieggafápmoplánaid Muosáin
Aneo AS ii áiggo šat bargat viidáseappot bieggafápmorusttet plánaiguin Muosáin Finnmárkkus.
– Gielda lea addán dieđu ahte eai háliit ahte mii joatkit prošeavttain. Midjiide lea dehálaš juohke prošeavttas ahte olbmot báikkálaččat dorjot prošeavtta.
Nu vástida prošeaktajođiheaddji Marit Riiber dasa manne loahpahit prošeavtta.
Plánaid mielde galge cegget bieggaturbiinnaid Niipavárrái.
Aneo AS fitnodagas leat guokte eará prošeavtta Finnmárkkus maiguin áigot bargat viidáseappot.
Dáid prošeavttaid sii sáddejit Norgga čázádat- ja energiijadirektoráhtii ovdal áigemeari mii lea dán mánu 22. beaivvi.
Dát prošeavttat leat Hámmerfeasttas ja Davvesiiddas.