Kárášjoga diggeášši máksán 49 miljovnna
Advokáhtagolut Kárášjoga oamastanvuoigatvuođa diggeáššis leat dán rádjai máksán 49 miljon ruvnnu.
Meahcceduopmostuolu ášši mávssii 24,35 miljon ruvnnu. Alimusriekteášši fas mávssii 24,63 miljon ruvnnu. Eanaš advokáhtagolut, muhto veahá maid lea mannan mátkkošteapmái ja orrumii.
Dáid ruđaid livčče ovddeš stuorradiggeáirasa Olav Gunnar Ballo ja fylkasátnejođiheaddji Hans-Jacob Bønå mielas galgan eará láhkai geavahit.
– Orro issoras. Dáid ruđaid livčče baicce sáhttán geavahit ovdánahttit Kárášjoga, dadjá Bønå.
Ballo mielas ledje dát ruđat galgat mannat Finnmárkku ássanmiela nannemii. Su áiggis, de jienastii son Finnmárkolága vuostá.
Muhto sámediggepresideantta, Silje Karine Muotka, mielas lea dehálaš eamiálbmotpolitihkkii kártet vuoigatvuođaid maid sápmelaččat leat háhkan.
– Danne ii leat boastut geavahit dánlágan resurssaid go eanavuoigatvuođat dohkkejuvvojit ja mearriduvvojit, dadjá son.
Kárášjoga ássit eai dárbbaš máksit ášši áššegoluid. Jos vuoittáhallet áššis, de máksá stáhta advokáhtagoluid. Jos vuitet, de lea Finnmárkkuopmodat mii gártá máksit.
