Kárášjoga-áššis oaidná ovttaláganvuođaid Čáhput-áššiin
Duorastaga álgá Kárášjoga-ášši Alimusrievttis ja okta sis guhte lei njunnošis Čáhput-áššis badjelaš 20 áigi čuovvu dál dárkilit Kárášjoga-ášši.
Ovddeš sámediggeáirras ja Sámi vuoigatvuođalávdegotti lahttu Eilif O. Larsen lei okta njunušolbmuin Čáhput-áššis. Son jođihii Čáhput-siidda ja nu dovdá son ášši bures. Dan čállá Ávvir neahtta.
Kárášjoga-áššis oaidná son čielga ovttaláganvuođaid iežaset áššiin. Ovttajienalaš Alimusriekti celkkii golggotmánu 5. beaivve 2001:s duomu Čáhput-áššis ahte Olmmáivákki eanaeaiggádat ledje rievttes eaiggádat, oktasaš dološ áiggi rájes geavaheami geažil. Nu sáhttá Kárášjoga-ášši buohtastahttit Čáhput-áššiin, lohká Larsen Ávvir neahtta áviisii.