Biret Elle Láilá dahje Laila Somby Sandvik lea ovddidan luođi dološ vuogi mielde nugo servvoštallamiin, erenoamáš dáhpáhusain, heajain ja eará doaluin.
Láillá arenat eai leat leamaš, eaige leat stuorra lávddit. Son lea juoiggadan juohke sajis gos leš lea leamaš ja lea dainna lágiin movttiidahttán earáid juoigat.
Lea somá ja guoibmái gullat Láillá rohtteheamen dološ ja dáláš luđiid. Son máhttá hirbmat ollu luđiid. Su juoigan bostá olbmuid. Šaddá miella juoiggastit ja čuovvolit. Nie lea Láilá čuovvolahttán sihke mánáid, nuoraid, ollesolbmuid ja boares olbmuid juoigat.
Láilá lea áŋgiris juoigi. Ii leat várra nu imaš go diehtá ahte Láilá lea bajásšaddan juoigalas guovllus, Bieskkenjárggas, gos luohti ja juoigan lei ja lea ain dábálaš juohkebeaivválaš eallimis. Nu šattai luohti maiddái lunddolaš oassin Láilái.
Láilá oahpai juoigat dalle go ii galgan juoigat ja dalle go badjelgehčče luođi. Su ruovttus ja lagašbirrasis movttiidahtte ollesolbmot mánáid ja nuoraid juoigat ja čevllohallat luđiin. Sus lei oainnat čeahpes ofelaš, eadnis Biret Elle.
Láilá oahpai ahte luohti lea divrras árbi man galgá várjalit ja skeŋket earáide ja erenoamážit maŋisboahtti buolvvaide. Láilá lea vuhtiiváldán rávvagiid ja lea oahpahan luođi earáide ja erenoamážit mánáide ja nuoraide. Oahpahettiin lea Láilá movttiidahttán mánáid ja nuoraid oahppat soga luđiid, danne dat nanne gullevašvuođa. Ná lea son addán luođi ođđa buolvvaide, mii duođašta ahte árbevirolaš luohti ja juoigan eallá boahtte áiggis.