Ruoŧa gánda Jon Henrik Fjällgren, njuorasmahtii oallugiid guovvamánus,
go juoiggai iežas buoremus olbmá, Daniel rohkki ruoŧa tv-prográmmas Talang Sverige.
Dáid beassážii, cuoŋománu 16. beaivvi čuojaha son Kárášjogas.
Barggai guhká oažžut Fjällgrena Kárášjohkii
Jergul Event jođiheaddji Rosie Holmestrand lohká iežas šaddan guhká bargat oažžut Jon Henrik Fjällgrena boahtit Kárášjohkii, šattai oalle máŋga maila čállit Fjällgrena manegmentai.
Vuorddašii gealdagasas vástádusa
– Son lei hirbmat gealdagasas go vuorddašii vástádussa boahtá go Fjällgren vai ii, ja go de oaččui dan dieđu ahte Jon Henrik Fjällgren boahtá Kárášjohkii dáid beassážiid de son šattai nu ilus ahte ribahii dánsestit vel, muitala Holmestrand.
Álggos Kárášjohkii ja de Riddu Riđđui
Dáid beassážiid čuojaha Kárášjogas ja geasset ges stuorra sámi festiválas Riddu Riđđus.
Rosie Holmestrand jáhkká ahte Jon Henrik Fjällgren lea šaddan beakkán danin go sus lea dakkár juoigan vuohki mii njuorasmahttá olbmuid.
– Bivnnut, čáppat ja fávru
– Ja dasa lassin de lean son bivnnut, čáppat ja fávru vel, ja jáhkká ollu nuorra nieiddaid ja nissonolbmuid illudit go dál Jon Henrik Fjällgren boahtá deike, dadjá Holmestrand.
Dál son dušše sávvá ahte nu oallugat go vejolaš bohtet guldalit, ja lohká jáhkit Jon Henrik Fjällgrena geasuhit ollu olbmuid.
– Leat jo oallugat jearahišgoahtán gos ja goas beassá bileahtaid oastit, ja dainna son livččege bargamin dál, lasiha son vel.
Dáinna luđiin njuorasmahtii Jon Henrik Fjällgren ollu olbmui miehtá máilmmi ruoŧa tv-prográmmas Talang Sverige: