– Diibmá álmmuhedje 28 artistta ođđa skearru. Mii leat válljen ovtta lávlaga 18 artisttas mii sáhttá šaddat diimmá buoremus rádiolávlla, muitala Kolbjørn Norvang.
Son lea okta daid njealljásiin jurys geat leat válljen 18 lávlaga mat gullojedje rádios 2015.
Don mearridat
Makkár lávlla šaddá dán jagi rádiolávlla leat guldaleaddjit geat mearridit. Dan beasat jienastit dás vuolábealde.
Magnus Vuolab ja Kolbjørn Norvang čuojaheaba ja kommentereba 6 daid nammaduvvon lávlaga rádios diibmu 1630 rájes. Daid eará lávlagiin soai joatkiba duorastaga ja maŋŋebárgga ja duorastaga boahtte vahkkus seamma áigái.
– Moai bohte dadjat vehá juohke lávlaga birra, dasa lassin bohte namuhit makkár musihkkateknihkaid artisttat leat atnán, muitala Magnus Vuolab.
Jienasteapmi bistá 12 beaivvi
Kriteria nammaduvvot gilvui lea ahte juohke artista beassá mielde ovtta lávlagiin. Dasa lassin ferte juohke lávlla leat álmmuhuvvon gaskal 1. beaivvi skábmamánus 2014 ja 1. beaivvi skábmamánus 2015.
Jury geat lea nammadan daid 18 lávlagat leat Kolbjørn Norvang, Tore Skoglund, Anne Marie Hætta ja Trine Ragnhild Boine.
Jienastit sáhttát sotnabeaivvi diimmu 23:59, 24.01.16, rádjai. Vuoiti álmmuhuvvo sierra neahttasáddagis Sami Music Awards oktavuođas beaivvi ovdal Sámi Álbmotbeaivvi, 5. beaivvi guovvamánus.